Phool maslain to unhein naghma-o-jhankar milein

Phool maslain to unhein naghma-o-jhankar milein 

Main ne kaantay to nahin boye keh angaar milein 

Aankh larzan hai sar-e-mehfil-e-hasti ae dost !

In ki chilman kay qareen tishna-e-deedar milein 

Us ko idraak ki pur'noor zuban kehtay hain 

Jis main insan ki tazeem kay atwaar milein 

Aisi majrooh tamana hi saleeb-e-gham hai 

Jis ko ghunchay bhi baharon main giriftaar milein 

Khoon-e-dil shart hai ae yaar ! baseerat kay liye 

Yeh bhi mumkin hai keh sehra'on main gulzar milein 

Heef us chara'gar-e-waqat ki qismat 

"Saghar" jis ko her gaam pe taqdeer kay beemar milein 

Chragh-e-toor jalao , bara andhera hai

Chragh-e-toor jalao , bara andhera hai 

Zara niqaab uthaao , bara andhera hai 

Woh jin kay hotay hain khorasheed aasteeno main 

Unhein kahin se bulaao , bara andhera hai 

Mujhay tumhari nigahon pe Aaitamaad nahin 

Meray qareeb na aayo , bara andhera hai 

Faraz-e-arsh se toota hua koi tara 

Kahin se dhoond kay laao , bara andhera hai 

Abhi to subha kay maathay ka rang kala hai 

Abhi faraib na khaao , bara andhera hai 

Baseeraton pe ujaalon ka khouf taari hai 

Mujhay yaqeen dilaao , bara andhera hai 

Jissay zuban-e-khird main sharab kehtay hain 

Woh roshni si pilaao , bara andhera hai 

Be'naam-e-zohra jabeenan-e-khitha-e-firdos 

Kisi kiran ko jagao , bara andhera hai

Main keh Aashafta-o-ruswa sar-e-bazar hua

Main keh Aashafta-o-ruswa sar-e-bazar hua 

Chaak-e-damaan ka tamasha sar-e-bazar hua 

Teri asmat ki tijarat pas-e-dewaar sahi 

Meri taqdeer ka soda sar-e-bazar hua 

Phir koi ehal-e-junoon daar pe charh jaye ga 

Phir teray husan ka char'cha sar-e-bazar hua 

Hum ne rakha ussay dil kay makan main barson 

Jo kabhi hum se sha'nasa sar-e-bazar hua 

Marhalay deed kay dushwaar thay lakin "Saghar"

Manzil-e-toor ka jalwa sar-e-bazar hua

Hai dua yaad magar harf-e-dua yaad nahin

Hai dua yaad magar harf-e-dua yaad nahin 

Meray naghmaat ko andaz-e-nawa yaad nahin 

Hum ne jin kay liye rahon main bichaya tha lahu 

Hum se kehtay hain wohi ehad-e-wafa yaad nahin 

Zindagi jabar-e-musal'sal ki tarah kaati hai 

Janay kis jurm ki paai hai saza yaad nahin 

Main ne palkon se dar-e-yaar pe dastak di hai 

Main woh saa'il hoon jissay koi sada yaad nahin 

Kaisay bhar ayein sar-e-shaam kisi ki aankhein 

Kaisay tha'raai chraghon ki zia yaad nahin 

Sirf dhund'laey sitaron ki chamak dekhi hai 

Kab hua , kon hua , mujh se khafa yaad nahin 

Ayo ! ik sajda karein Aalam-e-madhoshi main 

Log kehtay hain keh "Saghar" ko Khuda yaad nahin 

Mohabbat mustaqil gham hai , Mohabbat gham ka gehwara

Mohabbat mustaqil gham hai , Mohabbat gham ka gehwara 

Jo aansoo rang le aaye wohi daman ka sheh'para 

Jissay arman ka khoon de kar be'naam-e-aarzu seecha 

Khuda janay kahan hai woh jahan-e-zindagi araa

Mera zouq-e-khari'dari hai ik jins-e-garaan maya 

Kabhi phoolon ka shaida'i , kabhi kaanton ka banjara

Jahan munsib Ataa hotay hain be'fikar-o-farasat bhi 

Wahan her justagoo jhooti , wahan her azam na'kara 

Basa auqaat choo leti hai daman kabirai ka 

Tumhari jumbish-e-aabru , meri takhleeq-e-awara 

Na'janay mohtasib kiyon meh'kaday ka naam detay hain 

Jahan kuch aadmi kartay hain apnay dard ka chaara 

Teray gaisoo khayalon ki girift-e-naaz se guzray 

Keh jaisay aik jigi ban main lehraata hai do tara 

Palat aaye hain shayed inqalab-e-deed kay lamhay 

Nazar ki wusaton main  doobta jata hai nazara 

Faqat ik haath main toota hau "Saghar" uthane se 

Larz utha hai ae yazdan ! teri azmat ka meenara

Jazba-e-soz-e-talab ko be'karan kartay chalo

Jazba-e-soz-e-talab ko be'karan kartay chalo 

Zarhay zarhay ko chragh-e-karwan kartay chalo 

Chasham-e-saqi par tabasum-e-meh'kada behka hua 

Aao , qismat ko hareef-e-keh'kishan kartay chalo 

Jin se zinda ho yaqeen-o-Aagahi ki Aabru 

Ishq ki raahon main kuch aisay guman kartay chalo 

Zindagi ko log kehtay hain bara-e-bandagi  !

Zindagi kat jaye gi zikar-e-buttan kartay chalo 

Her nafs ae jeenay walo ! shughal-e-paymana rahay 

Be'khudi ko zindagi ka paas'ban kartay chalo 

Toor par moqoof kiyon ho her taj'jali ki jhalak 

Tootay phootay jhompray jalwa fishan kartay chalo 

Chairr kar "Saghar" kisi kay gaiso'on ki dastaan 

Laal-o-gul ko zara shola zuban kartay chalo 

Koi titli hai na jugno , Aah shaam-e-be'kasi

Koi titli hai na jugno , Aah shaam-e-be'kasi 

Aaj dil main nastran ki shaakh phir chubhnay lagi 

Tu ne kya tora gulistan se wafa ka aik phool

Her kali hai ghair mehram , her shagufa ajnabi 

Be'irada chal raha hoon zindagi ki raah par 

Meray maslik main nahin hai kar-o-bar-e-rahbari 

Jis main kuch insan ki toqeer kay ehkaam thay 

Woh shariyat mah'badon kay zer-e-saya so gayi 

Aa gayein bazar main biknay Khuda ki zamatein 

Jee uthi hain khwaishein aur mar gaya aadmi 

Main sho'aon main pighal jaon meri fitrat nahin 

Woh sitara hoon keh jis ko dhoondti hai roshni 

Aur kiti door hain "Saghar" adm ki manzilein 

Zindagi se pooch loon ga raastay main gar mili 

Zehar-e-qaatil hai abgeeno main

Zehar-e-qaatil hai abgeeno main 

Saamp paltay hain Aasteeno main 

Chand qatray hain khoon-e-sa'il kay 

Ab sha'inshah  kay khazeeno main 

Khair ho ! Aasman sitaron ki 

Jag'magaye hain daagh seeno main 

Inqalaab-e-hayat kya kehiye 

Aadmi dhal gaye masheeno main 

Meray naghmon ka jee nahin lagta 

Mah paron main , meh jabeeno main 

Jao ! ehal-e-khird ki mehfil main 

Kya karo gay junoon nasheeno main 

Moj-e-sahil ko barh kay choom aayi 

Hum taraptay rahay safeeno main 

Kuch farishton ka naam insaan hai 

Meray ehsaas kay qareeno main 

Ab sha'raron ki fasal hai "Saghar"

Rang ugtay thay jin zameeno main

Waqar-e-anjuman hum se , farogh-e-anjuman hum hain

Waqar-e-anjuman hum se , farogh-e-anjuman hum hain

Sakoot-e-shab se poocho , subha ki pehli kiran , hum hain 

Ham hi si gulistan ki bijliyon ko khaas nisbat hai 

Baharein jaanti hain ronaq-e-sehan-e-chaman , hum hain

Zamanay ko na de ilzaam ae na'waqif-e-manzil ! 

Zamanay ki nazar hum hain , zamanay ka chalan , hum hain 

Qareeb-o-door ki baatein , nazar ka weham hain pyaray 

Yaqeen-e-reh'numa hum se , fasoon-e-rah'zan , hum hain 

Talu-e-aaftab hamaray naam par ho ga 

Woh jin ki khaak kay zarhay hain khursheed-e-watan , hum hain 

Behar surat hamari zaat se hain sil'salay saray 

Junoon ki sadagi hum hain , khir ka baank'pan , hum hain 

Hamaray haath main hai Saghar-e-farda idher dekho !

Idher dekho ! hareef-e-gardish-e-chirkh-e-kohan , hum hain 

Sar-e-maqtal hamein naghmaat ki taleem detay hain

Sar-e-maqtal hamein naghmaat ki taleem detay hain 

Yahan ehal-e-nazar zulmaat ki taleem detay hain 

Yahan kaliyan mehakti hain magar khushbu nahin hoti 

Shagoofay bar'mla  Afaat ki taleem detay hain 

Yahan kuch log aisay bhi hain zar'tabi qabaon main 

Sehar ka naam le kar raat ki taleem detay hain

Jinhein faizaan-e-gulshan hai na irfan-e-baharan hai 

Woh phoolon ko naye jazbaat ki taleem detay hain 

Rah-e-taqdeer us din kay liye kya dhoop aur saaye 

Teray gaiso jinhein halaat ki taleem detay hain 

Hamein zeba nahin deta rah-e-dushwar ka manzir 

Keh sehraon main bhi barsat ki taleem detay hain 

Jahan "saghar" sharab-e-zindagi ik zehar-e-qaatil hai 

Yaqeen walay wahan khad'shaat ki taleem detay hain