Mil rahay hain umar bhar alehida nahin huye

Mil rahay hain umar bhar alehida nahin huye

Ghamon se mar gaye magar alehida nahin huye

Main kya karon kahan hanson kahan par aankh num karon

Kabhi hum is se pesh'tar alehida nahin huye

Hawa chali to youn chali keh aag aur barh gayi

Alaao se magar sharar alehida nahin huye

Woh margh'zaar tha koi keh regzaar tha koi

Bahar se kabhi shajar  alehida nahin huye

Kisi bhi dil se khawaishein nikal do gay kis tarah 

Kisi jaga zameen se ghar alehida nahin huye

Nazar ko jo bhala laga usi pe dil machal gaya 

Kabhi kahin dil-o-nazar alehida nahin huye

Kisi ki aankh num nahin kisi ko koi gham nahin 

Yeh be'hissi hai kiyon agar alehida nahin huye

Zara si aik boond main jahan larz larz gaya 

Adeem ashk-o-chasham-e-tar alehida nahin huye

Firaq-o-hijar se tarap nikal do gay kis tarah 

Adeem behar se bhanwar alehida nahin huye

Adeem gham ajeeb hain azal se hi qareeb hain 

Kabhi kisi maqam par alehida nahin huye

Kis khud gharz jahan main aana para mujhay

Kis khud gharz jahan main aana para mujhay 

Haath apnay haath se churana para mujhay 

Pehlay zameen ka bojh banaya mera wajood 

Phir is zameen ka bojh uthana para mujhay

Teray liye sana-o-ibadat ki khetiyan 

Apnay liye anaaj ugaana para mujhay 

Chahon to Ae Khuda teri aankhein na gin sakon 

Phir bhi uchal kay khud ko dikhana para mujhay 

Saat aasman hain Gosh-e-Khuda ki tarah moheet 

Phir bhi bhout hi shor machana para mujhay

Main itna be'niaz nain hoon teri tarah 

Tang aa kay teray samnay aana para mujhay 

Suraj ponch saka na andheray talak Adeem 

Raat aayi to chragh jalana para mujhay

Yeh to nahin urooj-e-baharan chasheeda hoon

Yeh to nahin urooj-e-baharan chasheeda hoon 

Ae mousam-e-khizan main abhi no'dmeeda hoon 

Hansta hoon is liye  keh tabasum guzeeda hoon 

Duniya samjh rahi hai sitam na'reseeda hoon 

Meri sada jidher hai udher ki hawa nahin 

Awaz hoon zaroor maga na'shaneeda hoon 

Woh samnay hai phir bhi mujhay dekhta nahin 

Main afreeda ho kay bhi na'afreeda hoon 

Ab tak sawal-e-hijar ka soojha nahin jawab 

Ik umar ho gayi hai youn hi sar'khameeda hoon 

Dar hai keh aansu'on main kahin tu doob na jaye 

Tu samnay na aa main abhi aab'deeda hoon 

Ik aaftab-e-hijar falak par hua talooh 

Lagta hai sad'hazar qayamat chasheeda hoon 

Sab aarzi haroof hain tehreer-e-waqat kay 

Mujh main yeh farq hai keh zara khat'kasheeda hoon

Dast-e-talab karon to bhala kis tarah daraaz

Maloom hai mujhay keh main daman da'reeda hoon 

Dhalta nahin nigah se manzar judai ka 

Halan'keh main to sham-o-sehar aab'deeda hoon

Phir wohi dewar woh hi dar lagay

Phir wohi dewar woh hi dar lagay 

Yeh to phir mujh ko usi ka ghar lagay 

Gard suraj kay zameen ghoomi bhout

Us gali main ya meray chakar lagay 

Khawaishon ki jab bhi had bandi karon 

Dairay se her koi baahir lagay 

Ik takhiyul aur phir tera khayal 

Par to pehlay bhi thay ab sheh'par lagay 

Jab kabhi aaya taqabal ka sawal 

Khud se saray hi log behtar lagay 

Jis tarah ka beej waisa hi samar

Phal darakhton ko zameen ko ghar lagay 

Us jaga pe chaaon paati hai wajood

Jis jaga par dhoop ko thokar lagay 

Her dar-o-dewaar ki maangon dua 

Mujh ko to her ghar hi apna ghar lagay 

Bhook dekhon jab kisi ki bhi Adeem 

Dana-e-gandum mujhay kankar lagay

Pehlay is dehleez se to sar lagay

Pehlay is dehleez se to sar lagay 

Phir agar lagti hai to thokar lagay 

Kya mujhay aata hai rasta aik hi 

Yeh to phir mujh ko usi ka ghar lagay 

Yeh kahin rasta isi ka to nahin 

Her qadam pe kiyon mujhay thokar lagay 

Aik pathar yaad hai us ko bhout 

Youn to pagal ko kai pathar lagay 

Phir bichar jaye hamesha kay liye 

Woh galay aik baar to aa kar lagay 

Sab main tha ehsaas lakin itna kam 

Mujh ko saray log hi pathar lagay 

Wasal us ka meri qismat main Adeem 

Dar lagay mujh ko bhout hi dar lagay 

Yeh to seedhi baat hai bikul Adeem 

Husan woh jo aankh ko behtar lagay 

Be'wafa ko galiyan de kar Adeem 

Yeh laga shaitan ko kankar lagay 

Koi itna to saa'rahay aakhir

Koi itna to saa'rahay aakhir 

Us ne waday to nibhaye aakhir 

Phir na milnay ki qasam toot gayi 

Mil gaye phir sar-e-rahay aakhir 

Youn tarapna tha jo machli ki tarah 

Tu ne chora ussay kaahay aakhir 

Kitnay chehray hain haseen duniya main 

Koi kis kis ko sarahay aakhir 

Chahnay ki bhi to had hoti hai 

Dil kahan tak ussay chahay aakhir 

Thak kay beemar bhi dam tor gaya 

Kab talak koi kaa'rahay aakhir

Koi pathar koi gehar kiyon hai

Koi pathar koi gehar kiyon hai 

Farq logon main is qadar kiyon hai 

Tu mila hai to yeh khayal aaya 

Zindagi itni mukhtasir kiyon hai 

Jab tujhay loat kar nahin aana 

Muntazir meri chasham-e-tar kiyon hai 

Us ki aankhein kahin sadaf to nahin 

Us ka her ashk hi gehar kiyon hai 

Raat pehlay hi kiyon nahin dhalti 

Tairagi  shab ki ta'sehar kiyon hai 

Yeh bhi kaisa azab de dala 

Hai mohabbat to is qadar kiyon hai 

Tu nahin hai to roz-o-shab kaisay 

Shaam kiyon aa gayi sehar kiyon hai 

Kiyon rawana hai her gharri duniya 

Zindagi mustaqil safar kiyon hai 

Main to ik mustaqil musafir hoon 

Tu bhala mera humsafar kiyon hai

Tujhay milna nahin kisi se Adeem 

Phir bicharnay ka tujh ko dar kiyon hai

 

Khaak pe jab bikhar gaye aansu

Khaak pe jab bikhar gaye aansu 

Yeh laga jaisay mar gaye aansu 

Aaj palkon ki baar phaand gaye 

Aaj had se guzar gaye aansu 

Aasman bhar gaya sitaron se 

Gham ki jholi main bhar gaye aansu 

Dil ki ghathri main baandh rakhay thay 

Janay kaisay bikhar gaye aansu 

Apnay gham ki kasaftein thein bhout 

Us kay gham se nikhar gaye aansu 

Aaj to gham bhout ziyada hai 

Aaj janay kidher gaye aansu 

Zabt se ehad baandh rakha tha 

Aur phir bhi bikhar gaye aansu 

Sil-e-dariya to kuch nahin tha Adeem 

Apnay toofan se dar gaye aansu 

Dil karra to bhout kiya tha Adeem

Waqat-e-rukhsat bikhar gaye aansu 

Issay pana tha us ko khona tha

Issay pana tha us ko khona tha 

Yeh bhi hona tha woh bhi hona tha 

Kitni dair aur us ko rona tha 

Woh jo hona tha , woh to hona tha 

Shayed is wastay mili aankhein 

Bojh kuch aansu'on ka dhona tha 

Shab-e-mehtaab Aaftab-e-sham 

Aik chandi thi aik sona tha 

Kya ghazab kar liya hai aankhon ne 

Mujhay to tujh se chupp kay rona tha  

Hum ne moti samjh liye Adeem 

Warna daman kissay bighona tha

Raaz-e-dil aam kar gaye aansu

Raaz-e-dil aam kar gaye aansu 

Gham ko bad'naam kar gaye aansu 

Aaj us ne bhi haal pooch liya 

Aaj to kaam kar gaye aansu 

Log phoolon kay saath ponchay thay 

Aur hum thaam kar gaye aansu 

Hum kisi kay na thay magar hum ko 

Aap kay naam kar gaye aansu 

Her kisi aankh ne lagaye daam

Gham ko neelam kar gaye aansu 

Dhund si chaa gayi hai aankhon main 

Her taraf shaam kar gaye aansu 

Baat main bhi bhout asar tha Adeem 

Aur kuch kaam kar gaye aansu 

Shairy sirf shairy thi Adeem 

Us ko ilhaam kar gaye aansu