Kab us ka wisaal chahiye tha

Kab us ka wisaal chahiye tha 

Bas ik khayal chahiye tha 

Kab dil ko jo ab se gharz thi 

Honton ko sawal chahiye tha 

Shouq ik nafs tha aur wafa ko 

Paas-e-mah-o-saal chahiye tha 

Aik chehra sada tha jo hum ko

Be'misal-o-misaal chahiye tha 

Ik karb main zaat-o-zindagi hain 

Mumkin ko mohaal chahiye tha 

Main kya hoon bas ik malaal-e-mazi 

Us shakhs ko haal chahiye tha 

Hum tum jo bichar gaye hain hum ko 

Kuch din to malaal chahiye tha 

Hum tera hijar mana'nay kay liye niklay hain

Hum tera hijar mana'nay kay liye niklay hain 

Shaher main aag laganay kay liye niklay hain 

Shaher koochon main karo hashar bar'pa aaj keh hum 

Us kay waday ko bhulanay kay liye niklay hain 

Hum se jo rooth gaya hai woh bhout hai masoom 

Hum to aur'on ko mana'nay kay liye niklay hain 

Shaher main shor hai woh youn keh gumaan kay safri 

Apnay hi aap main aanay kay liye niklay hain 

Woh jo thay shaher-e-ta'hiyur teray pur fun ma'maar 

Wohi pur'fun tujhay dhaanay kay liye niklay hain 

Rah'guzar main teri qaleen bichanay walay 

Khoon ka farsh bichanay kay liye niklay hain 

Hamein karna hai Khuda'wand ki imdaad so hum 

Dair-o-kaaba ko laraanay kay liye niklay hain 

Sar-e-shab ik nayi tamseel bar'pa honi hai 

Aur hum parda uthanay kay liye niklay hain 

Hamein sai'raab nayi nasal ko karna hai so hum 

Khoon main apnay nahanay kay liye niklay hain 

Hum kahin kay bhi nahin par yeh hai ru'daad apni 

Hum kahin se bhi na janay kay liye niklay hain  

Ik gumaan ka haal hai , aur faqat gumaan main hai

Ik gumaan ka haal hai , aur faqat gumaan main hai

Kis ne azab-e-jaan saha , kon azab-e-jaan main hai 

Lamha-ba-lamha dam-ba-dam aan-ba-aan rm-ba-rm 

Main bhi guzishta'gaan main hoon , tu bhi gazashta'gaan main hai 

Aadam-o-zaat-e-kibriya  karb main hain juda juda 

Kya kahoon un ka maajra jo bhi hai imtihaan main hai 

Shaakh se urr gaya prind hai dil-e-shaam-e-dard mand 

Sehan main hai malaal sa huzan sa samaan main hai 

Khud bhi be'amaan hoon main , tujh main bhi be'amaan hoon main 

Kon sahay ga us ka gham woh jo meri amaan main hai 

Kaisa hisaab kya hisaab halat-e-haal hai azaab 

Zakham nafs nafs main hai zehar zaman zaman main hai 

Us ka firaaq bhi ziyaan , us ka wisaal bhi ziyaan 

Aik ajeeb kash'ma'kash halqa-e-be'dilaan main hai 

Bood-o-na'mood ka hisaab main nahin jaanta magar 

Saray wajood ki "Nahin" meray adm ki "Haan" main hai 

Kya yaqeen aur kya gumaan chup reh

Kya yaqeen aur kya gumaan chup reh 

Shaam ka waqat hai miyan , chup reh 

Ho gaya qissa-e-wajood tamaam 

Hai ab aaghaz-e-daastan , chup reh 

Main to pehlay hi jaa chuka hoon kahin 

Tu bhi jaana nahin yaahan , chup reh 

Tu ab aaya hai haal main apnay 

Jab zameen hai na aasman , chup reh 

Tu jahan tha , jahan jahan tha kabhi 

Tu bhi ab to nahin wahan , chup reh 

Zikar chaira Khuda ka phir tu ne 

Yahan hai insaan bhi rai'gaan , chup reh 

Sara soda nikaal de sar se 

Ab nahin koi aastaan , chup reh 

Ehar man ho , Khuda ho , ya aadam 

Ho chuka sab ka imtihaan , chup reh 

Darmiyani hi ab sabhi kuch hai 

Tu nahin apnay darmiyan , chup reh 

Ab koi baat teri baat nahin 

Nahin teri , teri zuban , chup reh 

Hai yahan zikar haal-e-mo'jooda 

Tu hai ab az-gaz'shat'gaan , chup reh 

Hijar ki jaan kani tamaam hui 

Dil hua Jon-e-be'imaan , chup reh 

Barson kay baad daikha , ik shakhs dil'ruba sa

Barson kay baad daikha , ik shakhs dil'ruba sa

Ab zehan main nahin hai par naam tha bhala sa

Aabru khichay khichay se aankhein jhuki jhuki si 

Baatein ruki ruki si lehja thaka thaka sa 

Alfaaz thay keh jugnu awaz kay safar main 

Ban jaye junglon main jis tarah raasta sa

Khawabon main khawab us kay yaadon main yaad us ki 

Neendon main ghull gaya ho jaisay keh rat'jaga sa

Pehlay bhi log aaye kitnay hi zindagi main 

Woh her tarah se lakin auron se juda sa

Agli mohabbaton ne woh nu'muradiyan dein 

Taza rafaqaton se dil tha dara dara sa

Kuch yeh keh muddaton se hum bhi nahin thay roye 

Kuch zehar main bujha tha ehbaab ka dilaasa 

Phir youn hua keh sawan aakhon main aa basay thay 

Phir youn hua keh jaisay dil bhi tha aabla sa

Ab sach kahein to yaaro hum ko khabar nahin thi 

Ban jaye ga qayamat ik waqiya zara sa 

Taiwar thay be'rukhi kay andaz-e-dosti kay 

Woh ajnabi tha lakin lagta tha aashna sa 

Hum dast thay keh dariya hum zehar thay keh amrat 

Na'haq tha Zoham hum ko jab woh nahin tha payasa

Hum ne bhi us ko daikha kal shaam ita'faaqan 

Apna bhi haal hai ab logo faraz ka sa  

Aazard'gaan-e-shaher ka jaisa bhi haal ho

Aazard'gaan-e-shaher ka jaisa bhi haal ho

Aye yaar-e-khush diyaar  tujhay kiyon malaal ho

Ab baat dosti ki nahin hoslay ki hai

Laazim nahin keh tu bhi mera hum'khayal ho

Khud mera haath jab meri bar'badiyon main tha

Teri jabeen pe kiyon arq-e-in'fa'aal ho

Phir tu ne chairr di hai gayi sama'aton ki baat

Woh guftagoo na kar keh tujhay bhi malaal ho

Meri zarooraton se ziyada karam na kar

Aisa salook kar keh meray hasb-e-haal ho

Toota to hoon magar abhi bikhra nahin Faraz

Meray badan pe jaisay shakiston ka jaal ho

Sitam gari ka her andaz meharmana laga

Sitam gari ka her andaz meharmana laga 

Main kya karon mera dushman mujhay bura na laga 

Her aik ko zoham tha kis kis ko na'khuda kehtay 

Bhala hua keh safeena kinaray ja na laga 

Meray sukhan ka qareena dao gaya mujh ko 

Keh jis ko haal sunaya ussay fasana laga 

Baroon-e-dar na koi roshni na saya tha 

Sabhi fasaad mujhay androon-e-khana laga 

Main thak gaya tha bhout pay-ba-pay uraano se

Jabhi to daam bhi is baar aashiyana laga 

Sitam kay ehad main , main bhi shareek hoon jaisay 

Mera sakoot mujhay sakhat mujar'mana laga 

Woh laakh zood faramosh ho Faraz magar 

Ussay bhi mujh ko bhulanay main ik zamana laga 

Sehar kay suraj main ro raha hoon

Sehar kay suraj 

Sehar kay suraj 

Main ro raha hoon 

Keh mera mashriq lahu lahu hai 

Woh mera mashriq 

Jo mera bazu hai mera dil hai meri namu hai 

Jo meray atraaf ka nishan 

Meri aabru hai 

Lahu lahu hai 

Sehar kay suraj 

Main nisf tareek 

Nisf roshan hoon 

Kya hua hai 

Tujhay ghunn lag gaya 

Keh mera wajood tukron main batt gaya hai 

Teri shua'on ka noor andheron main ghatt gaya hai 

Keh aaj her rishta-e-rafaqat hi katt gaya hai 

Sehar kay suraj 

Main apnay paikar ki nisf tasveer ho gaya hoon 

Main aap hi aaj apni tehqeer ho gaya hoon 

Main ism-e-sagheer ho gaya hoon 

Main apna aadha badan liye kis taraf ko jaon 

Kissay dikhaon 

Yeh sheesha-e-jaan ki kirchiyan 

Apnay khawab rezay kahan chupa'on 

Main apni wahiddat kahan se laon 

Sehar kay suraj 

Sitam ki aandhi rukay 

To main yeh ujaar aankhein jhapak sakon ga 

Sis'sak sakon ga 

Lahu ki baarish thamay 

To main is dukhi badan ko thapak sakon ga 

Abhi to main jaan'kani kay dohray azaab main hoon 

Jo bujh chukay woh chragh daikhon 

Keh apnay maathay ka dagh daikhon 

Sehar kay suraj 

Meri nazar main to in rafeeqon kay qaaflay hain 

Jo ghar se niklay thay sar uthaye qadam jamaye 

Jo muntazir thay 

Keh rizam gaah-e-talab bulaye 

Jo aazmaish ki her gharri main 

Yaqeen ki mish'alein jalaye 

Watan ki na'moos kay liye 

Be'shumaar bazu ilam uthaye  

Rawan huye thay yeh ehad kar kay 

Keh in ki jaanein rahein , keh jayein 

Magar wafa par na harf aaye 

Sehar kay suraj 

Meri nazar main in hi rafeeqon kay qaaflay hain 

Keh jin ka pindaar reza reza 

Keh jin kay maathay arq arq hain 

Jo pa'zanjeer 

Munfa'ilgardanein jhukaye 

Adu kay narghay main 

In andheron ki sar'zameen ki taraf rawan hain 

Jahan haqarat kay ta'an 

Nafrat kay sang 

Ruswaiyon kay bazar 

Muntazir hain 

Sehar kay suraj 

Yeh main na daikhon 

Yeh tu na daikhay 

Yeh jaan'nisaron , shaheed yaron ka cham'chamata lahu na daikhay 

Yeh main na daikhon 

Yeh tu na daikhay 

Her tamashai faqat sahil se manzir daikhta

Her tamashai faqat sahil se manzir daikhta 

Kon dariya ko ulat'ta kon gohar daikhta 

Woh to duniya ko meri dewangi khush aa gayi 

Teray hathon mian wagarna pehla pathar daikhta 

Aankh main aansu jarray thay par sada tujh ko na di 

Is tawaqo par keh shayed tu palat kar daikhta 

Meri qismat ki lakeerain meray hathon main na thein 

Teray maathay par koi mera muqaddar daikhta 

Zindagi phaili hui thi shaam-e-hijran ki tarah 

Kis ko itna hosla tha kon jee kar daikhta 

Doobnay wala tha aur sahil pe chehron ka hajoom 

Pal ki mohlat thi main kis ko aankh bhar kar daikhta 

Tu bhi dil ko ik lahu ki boond samjha hai Faraz 

Aankh agar hoti to qatray main samandar daikhta  

Tujh se bichar kay hum bhi muqaddar kay ho gaye

Tujh se bichar kay hum bhi muqaddar kay ho gaye 

Phir jo bhi dar mila hai , usi dar kay ho gaye

Phir youn hua keh ghair ko dil se laga liya 

Andar woh nafratein thein keh baahir kay ho agye 

Kya log thay keh jaan se barh kar aziz thay 

Ab dil se mehav naam bhi aksar ho gaye 

Aye yaad-e-yaar tujh se karein kya shikayatein 

Ae dard-e-hijar hum bhi to pathar kay ho gaye 

Samjha rahay thay mujh ko sabhi naas'haan-e-shaher 

Phir rafta rafta khud usi kaafir kay ho gaye 

Ab kay na intizaar karein chara'gar ka hum

Ab kay gaye to ku-e-sitam'gar kay ho gaye 

Rotay ho ik jazeerah-e-jaan ko Faraz tum 

Daikho to kitnay shaher samandar kay ho gaye