Main talkhi-e-hayat se ghabra kay pee gaya

Main talkhi-e-hayat se ghabra kay pee gaya 

Gham ki siyah raat se ghabra kay pee gaya 

Itni daqeeq shay koi kaisay samjh sakta hai 

Yazdan kay waqiyaat se ghabra kay pee gaya 

Chalkay huye thay jaam , parishaan thi zulf-e-yaar 

Kuch aisay haadsaat se ghabra kay pee gaya 

Main aadmi hoon , koi farishta nahin hazoor 

Main aaj apni zaat se ghabra kay pee gaya 

Duniya-e-haadsat hai ik dard'naak geet 

Duniya-e-haadsat se ghabra kay pee gaya 

Kaantay to khair kaantay hain in se gila hi kya 

Phoolon ki waardaat se ghabra kay pee gaya 

Saghar woh keh rahay thay keh pee leejiye hazoor 

Un ki guzarshaat se ghabra kay pee gaya 

Fariyad kay taqazay hain naghma-e-sukhan main

Fariyad kay taqazay hain naghma-e-sukhan main 

Alfaaz so gaye hain kaghaz kay pay'rahan main 

Her aan das rahi hain mazi ki talkh yaadein 

Mehsoos kar raha hoon be'chargi-e-watan main 

Tukra koi ataa ho ehraam-e-bandagi ka 

Sorakh par gaye hain ikhlaas kay kafan main  

Ae paasban-e-gulshan tujh ko khabar nahin hai 

Sholay bharak rahay hain phoolon ki anjuman main 

Ae yaar ! teray gham se fursat agar mili to 

Tabdeeliyan karon ga is aalam-e-kohan main 

Dekha hai main ne dil ki be'tabiyon ka manzar 

Ik toot'ti kali main , ik doobti kiran main 

Is darja dard afshaan gunchon ki daastan thi 

Kaantay se chubh rahay hain ehsaas kay badan main 

Shakhon pe un kay Saghar gaisu mehak rahay hain 

Tarteeb paa rahi hain rangeeniyan chaman main

Khata waar-e-murawat na ho marhoon-e-karam ho ja

Khata waar-e-murawat na ho marhoon-e-karam ho ja 

Musarat sar jhukaye gi pur'sitar-e-alam ho ja 

Inhi be'rabt khawabon se koi tabeer niklay gi 

Inhi uljhi hui rahon pe mera hum'qadam ho jaa

Kisi zar'daar se jins-e-tabasum maangnay walay 

Kisi be'kas kay laashay par shareek-e-chasham-e-nam ho ja 

Kisi din in andheron main chraghan ho hi jaye ga 

Jala kar daagh-e-dil koi zia-e-shaam-e-gham ho ja 

Tujhay suljahye ga ab inqalab-e-waqt ka shana 

Taqaz-e-junoon hai gaisu-e-doran ka kham ho ja 

Tajasus markaz-e-taqdeer ka qayel nahin hota 

Shaoor-e-bandagi ! begana-o-dair-o-haram ho ja 

Yeh manzil aur gard karwan Saghar kahan apnay 

Simat kar raah guzar-e-waqat par naqsh-e-qadam ho ja

Bigra jo naqsh-e-zeest bana shahkaar-e-zeest

Bigra jo naqsh-e-zeest bana shahkaar-e-zeest 

Aisay mittay keh ban gaye parwar'digar-e-zeest 

Kuch is tarah se zeest ko apnao dosto 

Ta'hashar mout ko bhi rahay intizaar-e-ezeest 

De haadsat-e-no ki surahi se aik jaam 

Saqi zara utarnay laga hai khumaar-e-zeest

Hilaaj ko qabool thi sooli raqeeb ki 

Musawar-e-zeest kay liye kafi hai daar-e-zeest  

Atki hui hai nok-e-mazda pe lahu ki boond 

Kaanton main pal rahi hai aroos-e-bahar-e-zeest 

Layein ghazal kay shaher se tashbeha kay chragh 

Ae hum sukhan ! chalo keh sajaein diyaar-e-zeest 

Saghar ki zindagi pe koi tab'sarah na kar 

Ik shamma jal rahi hai sar-e-rah'guzar-e-zeest 

Khird ba'khair ! junoon ko salam karna hai

Khird ba'khair ! junoon ko salam karna hai 

Jahan-e-ishq main ab aur kaam karna hai 

Yeh rang-o-bu kay khazanay baray dar'khishaan hain !

Dil-o-nigah ko bhi lala-faam karna hai 

Kitab-e-surat-e-ko'nain youn uthana hai 

Keh zarhay zarhay ko mehar-e-da'waam karna hai 

Sada-e-bu zar-o-suliman yahi thi duniya main 

Musaraton ko ghareebon kay naam karna hai 

Jinhein khuda ki tarah bolnay ki aadat hai 

Unhein zuban-e-bashar main kalaam karna hai 

Meray shaoor ko hajat nahin takaluf ki 

Tajaliyon ko nazar ka ghulam karna hai 

Koi haqeer se shay daal meray saghar main 

Keh zindagi ko bara-e-awam karna hai

Woh azam ho keh manzil-e-baydaar hans paray

Woh azam ho keh manzil-e-baydaar hans paray 

Her naqsh-e-paya jurrat-e-ruswa hans paray 

Ab kay baras bahar ki surat badal gayi 

Zakhmon main aag lag gayi gulzaar hans paray 

Is dard-e-dastan ki tamheed aap hain 

Jis dastaan-e-dard pe gham khawar hans paray 

Hairaan ho rahi hai shagoofay pe chandani 

Shayed qafas pe aaj giriftaar hans paray 

Lut jaye teray naam se her talkhi-e-jafa 

Woh kaam kar kay be'kas-o-na'daar hans paray 

Meray junoon ne aaj woh sajda adaa kiya 

Butt khana-e-hayat kay asaar hans paray 

Phir shaad'maan huye hain kharabay hayat kay 

Saghar kisi kay gaisu-e-kham'daar hans paray

Ae tagiyur-e-zamana yeh ajeeb dal'lagi hai

Ae tagiyur-e-zamana yeh ajeeb dal'lagi hai 

Na waqar-e-dosti hai na majaal-e-dushmani hai 

Yahi zulmatein cheeni jo teray surkh aanchalon main 

Inhi zulmaton se shayed meray ghar main roshni hai 

Meray saath tum bhi chalna , meray saath tum bhi aan a

Zara gham kay raaston main bari tez tairagi hai 

Yeh mushaida nahin hai , meray dard ki sada hai 

Meray daagh-e-dil luttay hain teri bazm jab saji hai 

Gham-e-zindagi ! kahan hai abhi wehshaton se fursat 

Teray naaz utha hi lain gay abhi zindagi pari hai 

Teray khushk gaisu'on main meri aarzu hai pinhaan 

Teray shokh bazu'on main meri daastan rachi hai 

Jissay apna yaar kehna ussay chorna bhanwar main 

Yeh hadees-e-dil'baran hai , yeh kamal-e-dil'bari hai 

Woh guzar gaya hai "Saghar" koi qaafla chaman se 

Kahin aag jal rahi hai , kahin raakh so gayi hai 

 

 

Zara gaisu-e-yaar , kholay gaye hain

Zara gaisu-e-yaar , kholay gaye hain

Tadabur kay bazar , kholay gaye hain

Shagoofon kay armaan nichoray gaye hain

Shararon kay israar , kholay gaye hain

Kai baar teri wafaon kay uqday

Sar-e-manzil-e-daar , kholay gaye hain

Surahi jaam se takraiye barsaat kay din hain

Surahi jaam se takraiye barsaat kay din hain 

Hadees-e-zindagi dohraiye barsaat kay din hain 

Safeena le chala hai kis mukhalif simt ko zaalim 

Zara malah ko samjahiye barsaat kay din hain 

Kisi pur'noor tohmat ki zaroorat hai ghattaon ko 

Kahin se meh'washon ko laiye barsaat kay din hain 

Tabiyat gardish-e-doran ki ghbrai hui si hai  

Parishan zulf ko suljhaiye barsaat kay din hain 

Baharein in dino dasht-e-biyabaan main bhi aati hain 

Faqeeron pe karam farmaiye barsaat kay din hain 

Yeh mousam shorish-e-jazbat ka makhsoos mousam hai 

Dil-e-na'daan ko behliye barsaat kay din hain 

Sohanay aanchalon kay saaz par aashar "Saghar" kay 

Kisi be'chain dhun main gaaiye barsaat kay din hain

Gham ki tasveer , ghazal kay aashar

Gham ki tasveer , ghazal kay aashar

Khoon ki tehreer , ghazal kay aashar

Daagh kehtay hain mohabbat kay jinheijn

Un ki tanveer , ghazal kay aashar

Un ki tadbeer ki shammein  roshan 

Soz-e-taqdeer , ghazal kay aashar

In main pai'kan hain teri aankhon kay 

Daar-o-sham'sheer , ghazal kay aashar

Gaisu-e-waqat ko suljhatay hain 

Dard-e-shabir , ghazal kay aashar

Naala-o-shewan-e-fariyad ki lay 

Raqs-e-zanjeer , ghazal kay aashar

Ae gham-e-yaar tasawur tera 

Teri toqeer , ghazal kay aashar

Gul jo khiltay hain khizan main saghar 

Un ki tafseer , ghazal kay aashar