Zehar-e-qaatil hai abgeeno main

Zehar-e-qaatil hai abgeeno main 

Saamp paltay hain Aasteeno main 

Chand qatray hain khoon-e-sa'il kay 

Ab sha'inshah  kay khazeeno main 

Khair ho ! Aasman sitaron ki 

Jag'magaye hain daagh seeno main 

Inqalaab-e-hayat kya kehiye 

Aadmi dhal gaye masheeno main 

Meray naghmon ka jee nahin lagta 

Mah paron main , meh jabeeno main 

Jao ! ehal-e-khird ki mehfil main 

Kya karo gay junoon nasheeno main 

Moj-e-sahil ko barh kay choom aayi 

Hum taraptay rahay safeeno main 

Kuch farishton ka naam insaan hai 

Meray ehsaas kay qareeno main 

Ab sha'raron ki fasal hai "Saghar"

Rang ugtay thay jin zameeno main

Waqar-e-anjuman hum se , farogh-e-anjuman hum hain

Waqar-e-anjuman hum se , farogh-e-anjuman hum hain

Sakoot-e-shab se poocho , subha ki pehli kiran , hum hain 

Ham hi si gulistan ki bijliyon ko khaas nisbat hai 

Baharein jaanti hain ronaq-e-sehan-e-chaman , hum hain

Zamanay ko na de ilzaam ae na'waqif-e-manzil ! 

Zamanay ki nazar hum hain , zamanay ka chalan , hum hain 

Qareeb-o-door ki baatein , nazar ka weham hain pyaray 

Yaqeen-e-reh'numa hum se , fasoon-e-rah'zan , hum hain 

Talu-e-aaftab hamaray naam par ho ga 

Woh jin ki khaak kay zarhay hain khursheed-e-watan , hum hain 

Behar surat hamari zaat se hain sil'salay saray 

Junoon ki sadagi hum hain , khir ka baank'pan , hum hain 

Hamaray haath main hai Saghar-e-farda idher dekho !

Idher dekho ! hareef-e-gardish-e-chirkh-e-kohan , hum hain 

Sar-e-maqtal hamein naghmaat ki taleem detay hain

Sar-e-maqtal hamein naghmaat ki taleem detay hain 

Yahan ehal-e-nazar zulmaat ki taleem detay hain 

Yahan kaliyan mehakti hain magar khushbu nahin hoti 

Shagoofay bar'mla  Afaat ki taleem detay hain 

Yahan kuch log aisay bhi hain zar'tabi qabaon main 

Sehar ka naam le kar raat ki taleem detay hain

Jinhein faizaan-e-gulshan hai na irfan-e-baharan hai 

Woh phoolon ko naye jazbaat ki taleem detay hain 

Rah-e-taqdeer us din kay liye kya dhoop aur saaye 

Teray gaiso jinhein halaat ki taleem detay hain 

Hamein zeba nahin deta rah-e-dushwar ka manzir 

Keh sehraon main bhi barsat ki taleem detay hain 

Jahan "saghar" sharab-e-zindagi ik zehar-e-qaatil hai 

Yaqeen walay wahan khad'shaat ki taleem detay hain

Mata-e-kosar-o-zam zam kay paimanay teri aankhein

Mata-e-kosar-o-zam zam kay paimanay teri aankhein 

Farishton ko bana deti hain dewane teri aankhein 

Jahan rang-o-bu uljha hau hai in kay doron main 

Lagi hain ka'kal-e-taqdeer suljhanay teri aankhein 

Isharon se dilon ko chairr kar iqraar karti hain 

Luta'ti hain bahar-e-no kay nazranay teri aankhein 

Woh dewanay zama'may-e-lala-o-gul thaam letay hain 

Jinhein mansoob kar deti hain veeranay teri aankhein 

Shagufon ko shararon ka machalta roop deti hain

Haqeeqat ko bana deti hain fasanay teri aankhein 

Gadaa qana'at ko bechtay hain

Gadaa qana'at ko bechtay hain 

Khuda ki doulat ko bechtay hain 

Yeh husn walay qadam qadam par 

Qaraar-o-rahat ko bechtay hain 

Ajeeb hain baagh'ban chaman kay 

Gulon ki nikhat ko bechtay hain 

Watan main aisay bhi reh'numa hai 

May qayadat ko bechtay hain 

Yeh wa'iz-o-parsa Khudaya !

Teri fazeelat ko bechtay hain 

Khird ka letay hain naam "Saghar"

Junoon ki azmat ko bechtay hain

Her marhala-e-shouq se lehraa kay guzar jaa

Her marhala-e-shouq se lehraa kay guzar jaa

Asaar-e-tala'tum hoon to bal kha kay guzar jaa

Behki hui makh'moor ghatta'on ki awaz sun !

Firdos ki tadbeer ko behlaa kay guzar jaa

Mayoos hain ehsaas ki uljhi hui raahein 

Payal dil-e-majboor ki chhan'ka kay guzar jaa

Yazdaan-o-ehar mann ki hikayat kay badlay 

Insaan ki riwayaat ko dohraa kay guzar jaa

Kehti hain tujhay meh'kada-e-waqat ki raahein 

Bigri hui taqdeer ko suljha kay guzar jaa

Bujhti hi nahin tishnagi-e-dil kisi surat 

Ae abar-e-karam aag hi barsaa kay guzar jaa

Kaantay jo lagein haath to kuch gham nahin "Saghar"

Kaliyon ko her gaam pe bikhraa kay guzar jaa

Haadsay kya kya tumhari be'rukhi se ho gaye

Haadsay kya kya tumhari be'rukhi se ho gaye 

Sari duniya kay liye hum ajnabi se ho gaye 

Gardish-e-doran , zamanay ki nazar , aankhon ki neend 

Kitnay dushman aik rasam-e-dosti se ho gaye 

Kuch tumharay gaiso'on ki bar'hami ne kar diye 

Kuch andheray meray ghar main roshni se ho gaye 

Youn to hum Aagaah thay siyaad ki tadbeer se

Hum aseer-e-daam-e-gul apni khushi se ho gaye 

Banda parwar ! khul gaya hai Aastano ka bharram 

Aashna kuch log raaz-e-be'khudi se ho gaye 

Ab kahan ae dost ! chasham-e-muntazir ki aabru 

Ab to un kay ehad-o-paymaan her kisi se ho gaye 

Her qadam "Saghar" ! nazar aanay lagi hain manzilein 

Marhalay kuch teh meri awargi se ho gaye

Ru'daad-e-mohabbat kya kehiye , kuch yaad rahi kuch bhool gaye

Ru'daad-e-mohabbat kya kehiye , kuch yaad rahi kuch bhool gaye 

Do din mussarat kya kehiye , kuch yaad rahi kuch bhool gaye 

Jab jaam diya saqi ne  , jab dour chala tha mehfil main 

Ik hosh ki sa'at kya kehiye , kuch yaad rahi kuch bhool gaye 

Ab waqat kay nazuk honton par majrooh taranum raqsan hai 

Be'daad-e-mash'eeat kya kehiye , kuch yaad rahi kuch bhool gaye 

Ehsaas kay meh'khanay main kahan ab fikar-o-nazar ki qandeelain 

Aalaam ki shiddat kya kehiye , kuch yaad rahi kuch bhool gaye 

Kuch haal kay andhay sathi thay , kuch mazi kay ayaar sajan 

Ehbaab ki chahat kya kehiye , kuch yaad rahi kuch bhool gaye 

Kaanton se bharra hai daman , shabnam se sulagti hain palkein 

Phoolon ki sakhawat kya kehiye , kuch yaad rahi kuch bhool gaye 

Ab apni haqeeqat bhi "Saghar" be'rabt kahani lagti hai 

Duniya ki haqeeqat kya kehiye , kuch yaad rahi kuch bhool gaye

Ae dost ! yahan veerano ko gulzaar samjhna parta hai

Ae dost ! yahan veerano ko gulzaar samjhna parta hai 

Kuch oonchi neechi raahon ko hum'waar samjhna parta hai 

Ehsaas kay ultay paaon se jab chaltay chaltay thak jayein 

To raah'guzar ko ae rahi dewar samjhna parta hai 

Majrooh ma'eeshat kay haathon insan ka ab yeh aalam hai 

Her zakham laganay walay ko gham'khwar samjhna parta hai 

Jab shahi qabaon ki khatar kuch jism bar'hana ho jayein 

Us waqay ghulamon ko "Saghar" mukhtaar samjhna parta hai

Meri nigah-e-shouq se her gul hai devta

Meri nigah-e-shouq se her gul hai devta 

Main ishq ka Khuda hoon mujhay yaad keejiye

Bhuli hui sada hoon mujhay yaad keejiye

Bhuli hui sada hoon mujhay yaad keejiye 

Tum se kahin mila hoon mujhay yaad keejiye 

Manzil nahin hoon , khizer nahin , raah'zan nahin 

Manzil ka raasta hoon mujhay yaad keejiye 

Meri nigah-e-shouq se her gul hai devta 

Main ishq ka Khuda hoon mujhay yaad keejiye 

Naghmon ki ibtida thi kabhi meray naam se

Ashkon ki intihaa hoon mujhay yaad keejiye 

Gum sum kharri hain dono jahan ki haqeeqatein 

Main in se keh raha hoon mujhay yaad keejiye 

"Saghar" kisi kay Husan-e-taghafal shiyaar ki 

Behki hui adaa hoon mujhay yaad keejiye

Her shay hai pur'malaal bari tez dhoop hai

Her shay hai pur'malaal bari tez dhoop hai 

Her lab pe hai sawal bari tez dhoop hai 

Chakraa kay gir na jaon main is tez dhoop main 

Mujh ko zara sambhaal bari tez dhoop hai 

De hukam badalon ko khayaban-e-nash-e-man hoon 

Jaam-o-sabu uchaal bari tez dhoop hai 

Mumkin hai abar-e-rehmat-e-yazdan baras paray 

Zulfon ki chaaon daal bari tez dhoop hai 

Ab shaher-e-aarzoo main woh ra'naiyan kahan 

Hain gul'kaday nidhaal bari tez dhoop hai 

Samjhi hai jis ko saaya-e-umeed aqal-e-khaam 

"Saghar" ka hai khayal bari tez dhoop hai  

Chot kha kar khud shanas-o-khud'nigar ho jaaiye

Chot kha kar khud shanas-o-khud'nigar ho jaaiye

Kiyon kisi kay ishq main shoreeda-e-sar ho jaaiye

Apnay dil kay daagh bhi lo de uthein to kam nahin 

Apni amnzil kay liye khud rah'bar ho jaaiye

Chor deejiye ! azmat-e-yazdan ki jhooti dastaan 

Aaj insan ki nazar main moh'tabar ho jaaiye

Aap bhi do chaar qatray pee kay meray jaam kay 

Ehal-e-dil , ehal-e-wafa , ehal-e-nazar ho jaaiye

Sirf toofan main yahi bachnay ki tadbeer hai 

Jis taraf mojein umadti hon udher ho jaaiye

Phir zara chalkaiye ! Saghar may dedaar kay 

Phir niqab-e-rukh ulat kar jalwa'gar ho jaaiye

Bar'gashta-e-yazdan se kuch bhool hui hai

Bar'gashta-e-yazdan se kuch bhool hui hai 

Bhatkay huye insaan se kuch bhool hui hai 

Taray se chamak uthay hain saqi ki jabeen par 

Shayed meray emaan se kuch bhool hui hai 

Ta'had-e-nazar sholay hi sholay hain chaman main 

Phoolon kay nigheban se kuch bhool hui hai 

Shakhon pe chataktay huye ghunchon ko mubarak 

Is zulf-e-parishan se kuch bhool hui hai 

Jis ehad main lut jaye faqeeron ki kamai 

Us ehad kay sultan se kuch bhool hui hai 

Hanstay hain meri surat-e-mufton pe shagoofay 

Meray dil-e-na'daan se kuch bhool hui hai 

Hooron ki talab aur meh-o-saghar se nafrat 

Zahid teray irfan se kuch bhool hui hai

Zouq-e-tugi'yan main dhal kay dekh kabhi

Zouq-e-tugi'yan main dhal kay dekh kabhi  

Moj ban kay ucchal kay dekh kabhi  

Tu sadaf hai to is samandar main 

Sang'rezay nigal kay dekh kabhi  

Aatish-e-aarzoo ajab shai hai !

Is ki thandak main jal kay dekh kabhi  

Dekh khushk sehra bhi rashk-e-gulshan hai 

Apnay ghar se nikal kay dekh kabhi  

Ae giraftaar-e-rehbar-o-manzil !

Be'irada bhi chal kay dekh kabhi  

Zindagi ki mithaas kay ham'raah 

Zehar-e-gham ko nigal kay dekh kabhi  

Hai baharon ki justagoo  "Saghar"

Khaar zaaron main chal kay dekh kabhi 

Waqat kay rangeen guldastay ko yaad aaye ga thanda haath

Waqat kay rangeen guldastay ko yaad aaye ga thanda haath 

Jab bikhrein gay woh gaiso . to mar jaye ga thanda haath 

Bheegi palkein soch ki uljhan daman thamay pooch rahi hai 

Kab tak taar-e-giribaan yaaro ! sujhaye ga thanda haath 

Saz-e-ta'ghazal chairnay walo ! Ae afsanay likhnay walo !

Aaj lakeeron ki tafseerain dohraaiye ga thanda haath 

Garam lahu ki boondein , tanhai ki matti daalein 

Patt jhar aaye in shaakhon par ugg aaye ga thanda haath 

Pathar pathar jot jalay gi , sahil sahil sholay hon gay 

Bheegi bheegi sard hawa main sharma'iye ga thanda haath 

Baagh kay maali ! Meray gunchay ghairon ne pa'maal kiye hain 

Phir bhi teri phul'wari ko mehkaa'iye ga thanda haath

Nigaar-e-ma'eeshat lahu ro rahi hai

Nigaar-e-ma'eeshat lahu ro rahi hai 

Tasawur ki azmat lahu ro rahi hai 

Shagufon ki izzat pe chappay paray hain 

Chaman ki latafat lahu ro rahi hai 

Pila saqia ! koi jaam-e-ghazali 

Bhat'takti baseerat lahu ro rahi hai 

Faqeeron kay ikhlaas ki be'zubani 

Baro-e-jahalat lahu ro rahi hai 

Na sajday , na sajdon ki tabeer "Saghar"

Jabeen-e-shahadat lahu ro rahi hai

Teray gham ko mata-e-husan-e-insaan kar liya main ne

Teray gham ko mata-e-husan-e-insaan kar liya main ne 

Nigar-e-Admiyat ko ghazal khawan kar liya main ne 

Tarap kar soz-e-dil ko jalwa-e-saman kar liya main ne 

Bhout be'noor thi duniya chraghan kar liya main ne 

Kisi kay ik tabasum par asaas-e-zindagi rakh li 

Shararon ko nashaiman ka nighiban kar liya main ne 

Utha kar choom li hain chand mur'jhai hui kaliyan 

NA tum aaye to youn jasan-e-baharan kar liya main ne 

Khuda rakhye yeh uzar-e-jor baqi tum na sharmao !

Ab apni Aarzo'on ko pash-e-maan kar liya main ne 

Abhi tak be'kafan si hai meri wehshat ki ur'yaani 

YEh ksi umeed par ghar ko biyabaan kar liya main ne 

Kabhi "Saghar" agar main wajd main aaya jo lehraa kar 

to apnay saath duniya ko bhi raqsan kar liya main ne  

Hum khaak nasheen , khak basar shaher main teray

Hum khaak nasheen , khak basar shaher main teray

Kar lain gay isi tarah guzar shaher main teray

Jab tak teri galiyon se raha  hum ko taaluq 

Hum raqs rahay shams-o-qamar shaher main teray

Kuch log tamana'on ka khoon chehray pe mal kar

Baithay hain sar-e-raah'guzar shaher main teray

Uth'tay rahay kaliyon ki jawani kay janazay 

Jaltay rahay phoolon kay nagar shaher main teray

Palti hai taqadus kay libaday main haqarat 

Bajhtay hain hawadas  kay gajar shaher main teray

"Saghar" ki nigahon main khat'taktay hain abhi tak 

Kaj'laye huye sham-o-sehar shaher main teray

Kaliyon ki mehak hota , taaron ki zia hota

Kaliyon ki mehak hota , taaron ki zia hota 

Main bhi teray gulshan main , phoolon ka khuda hota 

Her cheez zamanay ki Aaina-e-dil hoti 

Khamosh mohabbat ka itna to sila hota 

Tum haal-e-parishan ki pur'sish kay liye aatay 

Sehra-e-tamana main mela sa laga hota 

Her gaam pe kaam aatay zulfon kay teri saa'iye 

YEh qaafla-e-hasti be'rahnuma hota 

Ehsaas ki daali par ik phool mehakta hai 

Zulfon kay liye tum ne ik roz chuna hota

Ehtiyatan fuqar ka her mar'hala kat'ta raha

Ehtiyatan fuqar ka her mar'hala kat'ta raha 

Itafaqan aap ki khairaat ka dharka raha 

Aaj phir shabnam kay qatron ne bajaya jal'ta'rang

Aaj phir daman meri awaz ka bheega raha 

Koi aaya hai na aaye ga dil-e-na'daan kabhi 

Meray darwaze ka parda to sada hilta raha 

Raat ki rani ka jhonka tha kisi ki yaad bhi 

Dair tak Aangan meray ehsaas ka mehka raha 

Tez ro chaltay hain "Saghar" qaaflay is naam se 

Reh'numaon se hamesha raah'zan acha raha 

Sitam jaagtay hain , karam so rahay hain

Sitam jaagtay hain , karam so rahay hain 

Mohabbat kay jaah-o-hasham so rahay hain 

Meray nikta sazo ! Sukhan kay khudao !

Pukaro ! KEh loh-o-qalam so rahay hain 

Her ik zehan main hai khudai ka dawa 

Her ik Aasteen main sanam so rahya hain 

Yahan khawab-e-rahat faraib-e-yaqeen hai 

NA tum so rahay ho , na hum so rahay hain 

Wahan chandani kay qadam doltay hain 

Jahan teray naqsh-e-qadam so rahay hain 

Ta'khiyal main hain gaiso'on kay bahanay 

Nigahon main rangeen bharram so rahay hain 

Meri ujri ujri si aankhon main "Saghar"

Zamanay kay ranj-o-alam so rahay hain  

Dastoor yahan bhi goongay hain , farmaan yahan bhi andhay hain

Dastoor yahan bhi goongay hain , farmaan yahan bhi andhay hain 

Ae dost ! Khuda ka naam na le , emaan yahan bhi andhay hain 

Taqdeer kay kalay kambal main , azmat kay fasanay liptay hain 

Mazmoon yahan bhi behray hain , unwaan yahan bhi andhay hain 

Zar'daar tawaqo rakhta hai , Na'daar ki gaarhi mehnat par 

Mazdoor yahan bhi dewane , zeeshan yahan bhi andhay hain 

Kuch log bharosa kartay hain tasbeeh kay chaltay dano par 

Be'chain yahan yaz'daan ka junoon , insaan yahan bhi andhay hain 

Be'naam jafa ki raahon par , kuch khaak se urti dekhi hai 

Hairaan hain dilon kay aainay , Na'daan yahan bhi andhay hain 

Be'rang shafaq se dhalti hai , be'noor saweray hotay hain 

Shair ka tasawur bhooka hai , Sultan yahan bhi andhay hain

Haazir sharab-o-jaam hain , tu jaag to sahi

Haazir sharab-o-jaam hain , tu jaag to sahi 

Iltaaf-e-khaas-o-aam hain , tu jaag to sahi

Hain ikhtiyar-e-shouq main taaron ki manzilein 

Behkay huye maqaam hain , tu jaag to sahi

Kaantay bhi aik cheez hain ,  tu dekh to sahi 

Gul bhi shara'ra faam hain , tu jaag to sahi

In shab ki zulmaton main kahin aas paas hi 

Subhon kay eh'tamaam hain , tu jaag to sahi

Afsurdagi gunnah ki tamseel hai Nadeem !

Be'chainiyan haram hain , tu jaag to sahi

Saghar ! Qareeb'tar hai , diyaar-e-maah-o-najoom

Bas aur chand gaam hain , tu jaag to sahi 

Umeed kay moti arzan hain , darwaish ki jholi khaali hai

Umeed kay moti arzan hain , darwaish ki jholi khaali hai 

Phoolon se mehaktay daaman hain , darwaish ki jholi khaali hai 

Ehsaas-e-safaai pathar hai , emaan sulagti dhooni hai 

Be'rung mizaaj-e-doran hain , darwaish ki jholi khaali hai 

Be'noor murawat ki aankhein , be'kaif inayat kay jazbay 

Her simat badaltay un'wan hain , darwaish ki jholi khaali hai 

Gudri kay phattay tukray "Saghar" Ajsaam-e-takhiyul kya dhampein  

Fariyad kay nuqtay hairan hain , darwaish ki jholi khaali hai

Tadbeer ka kaasa hai , taqdeer gada'gar hai

Tadbeer ka kaasa hai , taqdeer gada'gar hai 

Ewaan-e-sakhawat ki tameer gada'gar hai 

So rang bharray is main phir bhi yeh rahi moorat 

Ehsaas-e-musawur main tasveer gada'gar hai 

Halaat kay daman main aflaas-e-taghi'yur hai 

Is dour main insan ki toqeer gada'gar hai 

Ab shaher-e-baseerat ki oonchi hui deewarein 

Chartay huye suraj ki tanveer gada'gar hai 

Her daagh-e-tamana hai , kash'kol-e-gham-e-hasti 

Aahon se shikayat hai taseer gada'gar hai 

Jhankaar ki her surat dar'yooza-e-naghma 

Hai "Saghar" dar-e-zindaan par zanjeer gada'gar hai 

Sab dil rakhnay ki baatein hain

Sab dil rakhnay ki baatein hain 

Sab asli roop chupatay hain 

Ikhlaq se aari log yahan 

Lafzon kay teer chalatay hain 

Hum khushbu kay soda'gar hain

Aur saccha soda kartay hain 

Jo gaahak khud phoolon jaisa ho 

Hum bin daamon bik jaatay hain 

Hum shaher-e-wafa kay logon ka 

Tum haal bhala kya jano gay 

Hum dil ka dard chupatay hain 

Aur aansoo tak pee jaatay hain

Qurbat bhi nahin dil se utar bhi nahin jaata

Qurbat bhi nahin dil se utar bhi nahin jaata 

Woh shakhs koi faisala kar bhi nahin jaata 

Aankhein hain keh khaali nahin rehti hain lahu se 

Aur zakham-e-judai hai keh bhar bhi nahin jaata 

Hum doh'ri aziyat kay giraftaar musafir 

Paon bhi hain shal , shouq-e-safar bhi nahin jaata 

Dil ko teri chahat pe bharosa bhi bhout hai 

Aur tujh se bichar janay ka dar bhi nahin jaata 

Pagal huye jaatay ho "Faraz" us se milay kya 

Itni si khushi se koi mar bhi nahin jaata

Ki hai koi haseen khata her khata kay saath

Ki hai koi haseen khata her khata kay saath 

Thora sa payar bhi mujhay de do saza kay saath 

Gar doobna hi apna muqaddar hai to suno 

Doobain gay zaroor hum magar na'Khuda kay saath 

Manzil se woh bhi door tha aur hum bhi door thay 

Hum ne bhi dhool uraai bhout reh'numa kay saath 

Raqs-e-saba kay jashan main hum tum bhi naachtay 

Ae kaash tum bhi aa gaye hotay saba kay saath 

Aisa laga ghreebi ki raikha se hoon buland  

Poocha kisi ne haal kuch aisi adaa kay saath

Ronaqein thein jahan main kya kya kuch

Ronaqein thein jahan main kya kya kuch 

Log thay raftagaan main kya kya kuch 

Ab kay fasal-e-bahar se pehlay 

Rang thay gulistaan main kya kya kuch 

Kya kahon ab tumhein khizan walo 

Jal gaya Aashiyaan main kya kya kich 

Dil teray baad so gaya warna 

Shor tha is makaan main kya kya kuch 

Mohabbaton main her ik lamha wisal ho ga yeh teh hua tha

Mohabbaton main her ik lamha wisal ho ga yeh teh hua tha 

Bichar kay bhi aik doosray ka khayal ho ga yeh teh hua tha 

Yeh kya saansein ukhar gayi hain safar kay aaghaz se hi yaaro 

Koi bhi thak kar na raastay main nidhaal ho ga yeh teh hua tha 

Wohi hua na badaltay mousamon main tum ne hum ko bhula diya 

Koi bhi rut ho na chahaton ko zawal ho ga yeh teh hau tha 

Juda huye hain to kya hau phir yahi to dastoor-e-zindagi hai 

Judaiyon main na qurbaton ka malaal ho ga yeh teh hua tha 

Chalo keh "Fezan" kashtiyon ko jala dain gum'naam saahilon par 

Ab yahan se na wapsi ka sawal ho ga yeh teh hua tha

Tumhari bheegti palkon se main ne baar'haa poocha

Tumhari bheegti palkon se main ne baar'haa poocha 

Keh dil kay khail main jeetnay walay bhi rotay hain 

Woh jin ki chasham-e-khud'been ko dekha nahin karti 

Bhala kis dil se gham kay taar main moti piroye hain 

Tumhari bheegti palkon se main ne baar'haa poocha 

Keh jalnay aur jalanay main bhala kya lutf aata hai 

Bas ik jhooti ana kay wastay bar'baad ho jana 

Khudi kay zaham main insaan kitnay dukh uthata hai 

Woh kuch sunta to main kehta , mujhay kuch aur kehna tha

Woh kuch sunta to main kehta , mujhay kuch aur kehna tha 

Woh pal bhar ko jo ruk jata , mujhay kuch aur kehna tha 

Ghalat'fehmi ne baton ko barha dala youn hi warna 

Kaha kuch tha , woh kuch samjha , mujhay kuch aur kehna tha 

Kamai zindagi bhar us kay naam kiyon kar di 

Mujhay kuch aur kehna tha , mujhay kuch aur kehna tha 

Kahan us ne suni meri , suni bhi un'suni kar di 

Ussay maloom tha itna mujhay kuch aur kehna tha 

Rawan tha pyaar nas nas main , bhout qurbat thi aapis main 

Ussay kuch aur sun'nana tha , mujhay kuch aur kehna tha

Jism balor sa nazuk hai jawani bhar'pur

Jism balor sa nazuk hai jawani bhar'pur 

Ab kay angrai na tooti to badan tootay ga

Yeh main yeh ku-e-daar yeh tanhai dosto

Yeh main yeh ku-e-daar yeh tanhai dosto 

Kya tum bhi ban gaye ho tama'shai dosto 

Paigham-e-marg hai keh paigham-e-habib hai

sar sar chali keh baad-e-muraad aayi dosto 

Yeh kya keh aik teer-e-malamat na seh sakay 

Honi hai ku-ba'ku abhi ruswai dosto 

Aaghaz sham-e-hijar hai baithay raho abhi 

Tehro zara keh mout hai tanhai dosto 

Zanjeer kat gayi keh koi dost kat gaya 

Kuch to kaho yeh kaisi sada aayi dosto 

Ik baar us ko meri nigahon se dekh lo 

Phir khud kaho keh kon hai sodaai dosto 

Woh husan-e-dil'faroz keh jaan-e-Faraz hai 

Khalq-e-khuda hai us ki tamanai dosto

Janay kis gham se mann sulagta hai

Janay kis gham se mann sulagta hai 

Baat kartay dhan sulagta hai 

Gham lagata hai aag khilwat main 

Dil sar-e-anjuman sulagta hai 

Ehmareen jism aanch deta hua 

Jis tarah peh'rahan sulagta hai 

Yeh talb hai keh dard-e-mehroomi 

Abar chahye to ban sulagta hai 

Dekhna lu chali keh ba'murad 

Dosto phir chaman sulagta hai 

Jaag uthi khwaish-e-gunnah Faraz

Chandani main badan sulagta hai 

Chandani raat ko sehar kehna

Chandani raat ko sehar kehna 

Dosto ! youn nahin gar kehna 

Ab kahan woh bahar phoolon ki 

Gul-e-nargis ko chasham-e-tar kehna 

Bujh chukay hain mohabbaton kay chragh 

In diyaron ko ab khander kehna 

Raah main lutt kay baithnay walo 

Ab kisi ko na humsafar kehna 

Khud ujaagar karo hunar apna 

Dosron ko na kam-nazar kehna 

Hum ko awargi kay parday main 

Dil ki baatein idher udhar kehna 

Zikar tera gali gali karna 

Haal apna nagar nagar kehna 

Lab-e-goya azaab-e-jaan hai Faraz

Jo bhi kehna ho soch kar kehna

Ab tak teray fitnay hain salamat ussay kehna

Ab tak teray fitnay hain salamat ussay kehna 

Yaaro ! sar-e-mehshar bhi qayamat ussay kehna 

Ae hum'nafso mehav-e-gham-e-jaan hain abhi hum

Ayen gay sir-e-ku-e-malamat ussay kehna 

Myaar-e-nazar daar ki riffat bhi thi lakin 

Bhoola nahin tera qad-o-qamat ussay kehna 

Ik woh hi nahin tark-e-taaluq pe pash-e-maan 

Hai ehal-e-wafa ko bhi nadamat ussay kehna 

Ae dil-e-zad'gaan ! mout hai izhaar-e-tamana

Woh butt ho , khuda bhi to ussay khuda mat ussay kehna 

Her chand Faraz in dino matoob hai phir bhi 

Halaat ka mara hai bura mat ussay kehna

Hum apnay aap main gum thay hamein khabar kya thi

Hum apnay aap main gum thay hamein khabar kya thi 

Keh ma'waraye gham-e-jaan bhi aik duniya thi 

Wafa pe sakhat garaan hai tera wisaal-e-dawaam 

Keh tujh se mil kay bicharna meri tamana thi 

Hua hai tujh se bicharnay kay baad ab maloom 

Keh tu nahin tha teray saath aik duniya thi 

Khosha woh dil jo salamat rahay bazam-e-wafa

Nigah-e-ehal-e-jahan warna sang-e-khara thi

Diyar-e-ehal-e-sukhan par sakoot hai , keh hai jo tha 

Faraz meri ghazal bhi sada bas'hira thi

Dil ko ab youn teri her aik adaa lagti hai

Dil ko ab youn teri her aik adaa lagti hai 

Jis tarah nashay ki halat main hawa lagti hai 

Rat'jagay khawab-e-parishaan se kahin behtar hain 

Larz uth'ta hoon agar aankh zara num lagti hai 

Ae rag-e-jaan kay makeen tu bhi kabhi ghour se sun 

Dil ki dharkan teray qadmon ki sada lagti hai 

Go dukhi dil ko bhout hum ne bachaya phir bhi 

Jis jaga zakham ho wahan chot sada lagti hai 

Shaakh-e-umeed pe khiltay hain talab kay ghunchay 

Ya kisi shokh kay haathon main hina lagti hai 

Tera kehna keh hamein ronq-e-mehfil hain Faraz 

Go ta'ali hai magar baat Khuda lagti hai

Raatein hain udaas din karray hain

Raatein hain udaas din karray hain 

Ae dil teray hoslay baray hain 

Ae yaad habeeb saath dena 

Kuch marhalay sakhat aa paray hain 

Rukna ho agar to so bahanay 

Jana ho to raastay baray hain 

Ab kaisay bataein waja-e-gariya 

Jab aap bhi saath ro paray hain 

Ab janay kahan naseeb le jaye 

Ghar se to Faraz chal paray hain

Hum hain zulmat main keh ubhra nahin khurasheed ab kay

Hum hain zulmat main keh ubhra nahin khurasheed ab kay

Koi karta hi nahin raat ki tar'deed ab kay 

Kon sunta tha hadees-e-gham-e-dil youn to magar 

Hum ne chhairi hai teray naam se tamheed ab kay 

Pee gaye rind keh na'yaab hai sehba warna 

Zehar thi mohtasib-e-shaher ki tanqeed ab kay 

Tishnagi waja-e-junoon hai to chalo youn hi sahi 

Koi sang aaye sar-e-sagar-e-jamshaid ab kay 

Ik zamanay se na roye hain na jaan tarpi hai 

Dil pe laazim hai  teray dard ki tajdeed ab kay 

Qissa-e-ehal-e-wafa janay kahan tak ponchay 

Manzil-e-waar-o-risn tehri hai tamheed ab kay 

Lahu roye hain to gul'naar shafaq phoolay gi 

Aansoo boye hain to hum katein gay khursheed ab kay 

Hum ne yeh soch kay jaan di hai mohabbat main Faraz

buwa'lahoos kartay hain kis rang main taqleed ab kay

Lay urra phir koi khayal hamein

Lay urra phir koi khayal hamein 

Saqiya saqiya sambhal hamein

Ro rahay hain keh aik aadat hai 

Warna itna nahin malaal hamein 

Khilwati hain teray jamaal kay hum 

Aainay ki tarah sambhal hamein 

Marg-e-ambwa jashan-e-shadi hai

Mil gaye dost hasb-e-haal hamein 

Ikhtilaaf-e-jahan ka ranj na tha 

De gaye maat hum-khayal hamein 

Kya tawaqo karein zamanay se 

Ho bhi gar jurr'at-e-sawal hamein 

Hum yahan bhi nahin hain khush lakin 

Apni mehfil se mat nikaal hamein 

Hum teray dost hain Faraz gar 

Ab na uljhano main daal hamein

Sakoot-e-shaam-e-khizan hai qareeb aa jaao

Sakoot-e-shaam-e-khizan hai qareeb aa jaao 

Bara udaas samaan hai qareeb aa jao 

Na tum ko khud pe bharosa na hum ko zeham-e-wafa 

Na Aaitabar-e-jahan hai qareeb aa jao 

Raah-e-talab main kisi ko kisi ka dhiyaan nahin 

Hajoom-e-hum'safran hai qareeb aa jaao 

Jo dast-e-ishq main bichray woh umar bhar na milay 

Yahan dhuwan hi dhuwan hai qareeb aa jao 

Yeh Aandhiyan hain to shaher-e-wafa ki khair nahin 

Zamana khaak-fishaan hai qareeb aa jaao 

Faqiya-e-shaher ki mehfil nahin keh door raho 

YEh bazam-e-peer-maghaan hai qareeb aa jaao 

Faraz door kay suraj ghroob samjhay gaye 

Yeh dour kam-nazran hai qareen aa jaao 

Mohabbat zaat ki takmeel hoti hai

Mohabbat zaat hoti hai 

Mohabbat zaat hoti hai 

Mohabbat zaat ki takmeel hoti hai 

Koi jungle main jaa tehray , kisi basti main bas jaye 

Mohabbat saath hoti hai 

Mohabbat khushbo'on kay liye

Mohabbat mousamon ka dhun 

Mohabbat aabshaaron kay nikhartay paaniyon ka mann

Mohabbat junglon main raqs karti morni ka tan 

Mohabbat chilchalaatay garam sehraaon main thandi chayon ki maanind 

Mohabbat ajnabi duniya main apnay gaaon ki maanind

Mohabbat dil 

Mohabbat jaan 

Mohabbat rooh ka darmaan 

Mohabbat moorti hai 

Aur kabhi jo dil kay mandir main kahin par toot jaye to 

Mohabbat kaanch ki guriya 

Fizaon main kisi kay haath se gar choot jaye to 

Mohabbat aabla hai karb ka 

Aur phoot jaye to

Mohabbat rog hoti hai 

Mohabbat sog hoti hai 

Mohabbat shaam hoti hai 

Mohabbat raat hoti hai 

Mohabbat jhil'milaati aankh main barsaat hoti hai 

Mohabbat neend ki rut main haseen khwaabon kay raaston par 

Sulagtay 

Jaan ko aatay rat'jagon ki ghaat hoti hai 

Mohabbat jeet hoti hai 

Mohabbat maat hoti hai 

Mohabbat zaat hoti hai 

Woh ajeeb mousam tha hum ne koray kaaghaz par

Woh ajeeb mousam tha 

Hum ne koray kaaghaz par 

Apne khwaab likhay thay 

Hum ne khwaab dekhay thay 

Ankahi kahani ky 

Haroof sab dua se thay 

Dard ku bulawey thay 

Dil ki hukam'rani thi 

Door ufaq kinaron tak

Raah guizaar hamari thi 

Anginat zamano main 

Saans le rahay thay hum 

Ajnabi jazeeron main 

Naqsh paa hamaray thay 

Aankh main thein tehreerain 

Be'pannah jalwon ki 

Chandani ky lehjay ne 

Hum se guftagoo ki thi 

Zindagi ka her manzar 

Lamha lamha jaga tha 

Pehli baar hi hum ne 

Zindagi ko dekha tha 

Roz-o-shab ky meley main 

Khwaab hi to sacha tha 

Fasalon ky jungle main 

Khwaab kho bhi jatay hain

Main tumhain bhool jaon ab yahi munasib hai

Main tumhain bhool jaon ab yahi munasib hai

magar bhoolna bhi chahon to kis tarah bhoolon 

keh tum to phir bhi haqeeqat ho koi khawaab nahin

yahan to dil ka yeh aalam hai kiya kahoon

bhula saka na yeh woh silsala jo tha hi nahin

woh aik khyal jo awaz tak gaya hi nahin

woh aik baat jo main keh nahin saka tum se

woh aik rabt jo hum main kabhi raha hi nahin

mujhay hai yaad woh sab jo kabhi hua hi nahin

agar yeh haal hai dil ka to koi samjaeye

tumhain bhoolna bhi chahon to kis tarah bhoolon

keh tum to phir bhi haqeeqat ho koi khwaab nahin

main shair hoon to aksar log mujh se poochtay hain

main shair hoon to aksar log mujh se poochtay hain

is haseen israar ke baray main

bataein to bhala kiya hain?

mohabbat aakhrish hai kiya?

wasi main hans ke kehta hoon

kisi piyasay ko apney hissay ka pani pilana bhi 

mohabbat hai

bhanwar main doobtay ko sahil'on tak le ke jana bhi

mohabbat hai

kisi ke wastey nanhi si qurbani bhi 

mohabbat hai

kahin hum raaz saray khol saktay hon magar phir bhi

kisi ki be'basi ko dekh kar khamosh reh jana bhi

mohabbat hai

ho dil main dard , veerani magar phir bhi

kisi ke wastay jabran hi honthon par hansi lana 

zabardasti hi muskana bhi

mohabbat hai

kahin barish main sehmay bheegtay bili ke bachay ko

zara si der ko ghar le ke ana bhi

mohabbat hai

koi chiriya jo kamray main bhat'takti aan nikli ho

to us chriya ko 

phankay band kar ke raasta bahair ka diklana bhi

mohabbat hai

kisi ke zakham sehlana

kisi rotay huye ky dil ko behlana bhi

mohabbat hai

k meetahy bol, meethi baat , meethay lafaz , sab kiya hain?

mohabbat hai

mohabbat aik hi bas aik hi insaan ki khatar

 maghan rehna

hama waqat us ki baton , kushbo'on main dolna kab hai

mohabbat us ki zulf ke bul kholna kab hai

mohabbat ke hazaron rang

laakhon ista'array hain

kisi bhi rang main ho yeh 

mujhay apn abanati hai

yeh meray dil ko bhati hai