Kya yaqeen aur kya gumaan chup reh

Kya yaqeen aur kya gumaan chup reh 

Shaam ka waqat hai miyan , chup reh 

Ho gaya qissa-e-wajood tamaam 

Hai ab aaghaz-e-daastan , chup reh 

Main to pehlay hi jaa chuka hoon kahin 

Tu bhi jaana nahin yaahan , chup reh 

Tu ab aaya hai haal main apnay 

Jab zameen hai na aasman , chup reh 

Tu jahan tha , jahan jahan tha kabhi 

Tu bhi ab to nahin wahan , chup reh 

Zikar chaira Khuda ka phir tu ne 

Yahan hai insaan bhi rai'gaan , chup reh 

Sara soda nikaal de sar se 

Ab nahin koi aastaan , chup reh 

Ehar man ho , Khuda ho , ya aadam 

Ho chuka sab ka imtihaan , chup reh 

Darmiyani hi ab sabhi kuch hai 

Tu nahin apnay darmiyan , chup reh 

Ab koi baat teri baat nahin 

Nahin teri , teri zuban , chup reh 

Hai yahan zikar haal-e-mo'jooda 

Tu hai ab az-gaz'shat'gaan , chup reh 

Hijar ki jaan kani tamaam hui 

Dil hua Jon-e-be'imaan , chup reh 

Barson kay baad daikha , ik shakhs dil'ruba sa

Barson kay baad daikha , ik shakhs dil'ruba sa

Ab zehan main nahin hai par naam tha bhala sa

Aabru khichay khichay se aankhein jhuki jhuki si 

Baatein ruki ruki si lehja thaka thaka sa 

Alfaaz thay keh jugnu awaz kay safar main 

Ban jaye junglon main jis tarah raasta sa

Khawabon main khawab us kay yaadon main yaad us ki 

Neendon main ghull gaya ho jaisay keh rat'jaga sa

Pehlay bhi log aaye kitnay hi zindagi main 

Woh her tarah se lakin auron se juda sa

Agli mohabbaton ne woh nu'muradiyan dein 

Taza rafaqaton se dil tha dara dara sa

Kuch yeh keh muddaton se hum bhi nahin thay roye 

Kuch zehar main bujha tha ehbaab ka dilaasa 

Phir youn hua keh sawan aakhon main aa basay thay 

Phir youn hua keh jaisay dil bhi tha aabla sa

Ab sach kahein to yaaro hum ko khabar nahin thi 

Ban jaye ga qayamat ik waqiya zara sa 

Taiwar thay be'rukhi kay andaz-e-dosti kay 

Woh ajnabi tha lakin lagta tha aashna sa 

Hum dast thay keh dariya hum zehar thay keh amrat 

Na'haq tha Zoham hum ko jab woh nahin tha payasa

Hum ne bhi us ko daikha kal shaam ita'faaqan 

Apna bhi haal hai ab logo faraz ka sa  

Aazard'gaan-e-shaher ka jaisa bhi haal ho

Aazard'gaan-e-shaher ka jaisa bhi haal ho

Aye yaar-e-khush diyaar  tujhay kiyon malaal ho

Ab baat dosti ki nahin hoslay ki hai

Laazim nahin keh tu bhi mera hum'khayal ho

Khud mera haath jab meri bar'badiyon main tha

Teri jabeen pe kiyon arq-e-in'fa'aal ho

Phir tu ne chairr di hai gayi sama'aton ki baat

Woh guftagoo na kar keh tujhay bhi malaal ho

Meri zarooraton se ziyada karam na kar

Aisa salook kar keh meray hasb-e-haal ho

Toota to hoon magar abhi bikhra nahin Faraz

Meray badan pe jaisay shakiston ka jaal ho

Sitam gari ka her andaz meharmana laga

Sitam gari ka her andaz meharmana laga 

Main kya karon mera dushman mujhay bura na laga 

Her aik ko zoham tha kis kis ko na'khuda kehtay 

Bhala hua keh safeena kinaray ja na laga 

Meray sukhan ka qareena dao gaya mujh ko 

Keh jis ko haal sunaya ussay fasana laga 

Baroon-e-dar na koi roshni na saya tha 

Sabhi fasaad mujhay androon-e-khana laga 

Main thak gaya tha bhout pay-ba-pay uraano se

Jabhi to daam bhi is baar aashiyana laga 

Sitam kay ehad main , main bhi shareek hoon jaisay 

Mera sakoot mujhay sakhat mujar'mana laga 

Woh laakh zood faramosh ho Faraz magar 

Ussay bhi mujh ko bhulanay main ik zamana laga 

Sehar kay suraj main ro raha hoon

Sehar kay suraj 

Sehar kay suraj 

Main ro raha hoon 

Keh mera mashriq lahu lahu hai 

Woh mera mashriq 

Jo mera bazu hai mera dil hai meri namu hai 

Jo meray atraaf ka nishan 

Meri aabru hai 

Lahu lahu hai 

Sehar kay suraj 

Main nisf tareek 

Nisf roshan hoon 

Kya hua hai 

Tujhay ghunn lag gaya 

Keh mera wajood tukron main batt gaya hai 

Teri shua'on ka noor andheron main ghatt gaya hai 

Keh aaj her rishta-e-rafaqat hi katt gaya hai 

Sehar kay suraj 

Main apnay paikar ki nisf tasveer ho gaya hoon 

Main aap hi aaj apni tehqeer ho gaya hoon 

Main ism-e-sagheer ho gaya hoon 

Main apna aadha badan liye kis taraf ko jaon 

Kissay dikhaon 

Yeh sheesha-e-jaan ki kirchiyan 

Apnay khawab rezay kahan chupa'on 

Main apni wahiddat kahan se laon 

Sehar kay suraj 

Sitam ki aandhi rukay 

To main yeh ujaar aankhein jhapak sakon ga 

Sis'sak sakon ga 

Lahu ki baarish thamay 

To main is dukhi badan ko thapak sakon ga 

Abhi to main jaan'kani kay dohray azaab main hoon 

Jo bujh chukay woh chragh daikhon 

Keh apnay maathay ka dagh daikhon 

Sehar kay suraj 

Meri nazar main to in rafeeqon kay qaaflay hain 

Jo ghar se niklay thay sar uthaye qadam jamaye 

Jo muntazir thay 

Keh rizam gaah-e-talab bulaye 

Jo aazmaish ki her gharri main 

Yaqeen ki mish'alein jalaye 

Watan ki na'moos kay liye 

Be'shumaar bazu ilam uthaye  

Rawan huye thay yeh ehad kar kay 

Keh in ki jaanein rahein , keh jayein 

Magar wafa par na harf aaye 

Sehar kay suraj 

Meri nazar main in hi rafeeqon kay qaaflay hain 

Keh jin ka pindaar reza reza 

Keh jin kay maathay arq arq hain 

Jo pa'zanjeer 

Munfa'ilgardanein jhukaye 

Adu kay narghay main 

In andheron ki sar'zameen ki taraf rawan hain 

Jahan haqarat kay ta'an 

Nafrat kay sang 

Ruswaiyon kay bazar 

Muntazir hain 

Sehar kay suraj 

Yeh main na daikhon 

Yeh tu na daikhay 

Yeh jaan'nisaron , shaheed yaron ka cham'chamata lahu na daikhay 

Yeh main na daikhon 

Yeh tu na daikhay 

Her tamashai faqat sahil se manzir daikhta

Her tamashai faqat sahil se manzir daikhta 

Kon dariya ko ulat'ta kon gohar daikhta 

Woh to duniya ko meri dewangi khush aa gayi 

Teray hathon mian wagarna pehla pathar daikhta 

Aankh main aansu jarray thay par sada tujh ko na di 

Is tawaqo par keh shayed tu palat kar daikhta 

Meri qismat ki lakeerain meray hathon main na thein 

Teray maathay par koi mera muqaddar daikhta 

Zindagi phaili hui thi shaam-e-hijran ki tarah 

Kis ko itna hosla tha kon jee kar daikhta 

Doobnay wala tha aur sahil pe chehron ka hajoom 

Pal ki mohlat thi main kis ko aankh bhar kar daikhta 

Tu bhi dil ko ik lahu ki boond samjha hai Faraz 

Aankh agar hoti to qatray main samandar daikhta  

Tujh se bichar kay hum bhi muqaddar kay ho gaye

Tujh se bichar kay hum bhi muqaddar kay ho gaye 

Phir jo bhi dar mila hai , usi dar kay ho gaye

Phir youn hua keh ghair ko dil se laga liya 

Andar woh nafratein thein keh baahir kay ho agye 

Kya log thay keh jaan se barh kar aziz thay 

Ab dil se mehav naam bhi aksar ho gaye 

Aye yaad-e-yaar tujh se karein kya shikayatein 

Ae dard-e-hijar hum bhi to pathar kay ho gaye 

Samjha rahay thay mujh ko sabhi naas'haan-e-shaher 

Phir rafta rafta khud usi kaafir kay ho gaye 

Ab kay na intizaar karein chara'gar ka hum

Ab kay gaye to ku-e-sitam'gar kay ho gaye 

Rotay ho ik jazeerah-e-jaan ko Faraz tum 

Daikho to kitnay shaher samandar kay ho gaye   

Kaha tha kis ne keh ehad-e-wafa karo us se

Kaha tha kis ne keh ehad-e-wafa karo us se 

Jo youn kiya hai to phir kiyon gila karo us se 

Naseeb phir koi taqreeb-e-qarb ho keh na ho 

Jo dil main hon wohi baatein kaha karo us se 

Yeh ehal-e-bazam tanak hosla sahi phir bhi 

Zara fasana-e-dil ibtidaa karo us se 

Yeh kya keh tum hi gham-e-hijar kay fasanay kaho 

Kabhi to is kay bahanay suna karo us se 

Faraz tark-e-taluq to khair kya ho ga !!

Yeh hi bhout hai keh kam kam mila karo us se  

Dil garifta hi sahi bazam saja li jaye

Dil garifta hi sahi bazam saja li jaye 

Yaad-e-jaana se koi shaam na khaali jaye 

Rafta rafta yahi zindaan main badal jatay hain 

Ab kisi shaher ki buniyaad na daali jaye 

Mushaf-e-rukh hai kisi ka keh biyaaz-e-hafiz 

Aisay chehray se kabhi faal nikaali jaye 

Woh murawat se mila hai to jhuka doon gardan 

Meray dushman ka koi waar na khaali jaye 

Be'nawa shaher ka saya hai meray dil pe Faraz 

Kis tarah se meri Aashafta khayali jaye 

Shagufta dil hain keh gham bhi Ataa bahar ki hai

Shagufta dil hain keh gham bhi Ataa bahar ki hai 

Gul-e-habaab hain sar main hawa bahar ki hai 

Hajoom-e-jalwa-e-gul par nazar na rakh keh yahan 

Jarahaton kay chaman par rida bahar ki hai 

Koi to lala-e-kho'nain-e-kafan se bhi poochay 

Yeh fasal chaak-e-jiger ki hai ya bahar ki hai 

Main tera naam na loon phir bhi log peh'chanain 

Keh aap apna ta'aruf hawa bahar ki hai 

Shumaar zakham abhi se faraz kya karna 

Abhi to jaan meri ibtidaa bahar ki hai 

Abar-e-bahar ab kay bhi barsa parray parray

Abar-e-bahar ab kay bhi barsa parray parray 

Gulshan ujaar ujaar hain  jungle harray harray 

Janay yeh tishnagi hai hawas hai keh khud'kushi 

Jaltay hain shaam hi se jo saghar bharray bharray 

Hai dil ki mout ehad-e-wafa ki shakistagi 

Phir bhi jo koi tark mohabbat karay karay 

Ab apna dil bhi shaher-e-khamoshan se kam nahin 

Sun ho gaye hain kaan sada par dharray dharray 

Rehtay hain ehal-e-shaher kay saa'iye se door door 

Hum aahu in dasht ki surat darray darray 

Gul ban kay phoot'ta hai lahu shaakh'saar se 

Zakham rag-e-bahar hain pattay harray harray 

Zinda dilaan-e-shaher ko kya ho gaya Faraz

Aankhein bujhi bujhi hain to chehray marray marray 

Ab kis ka jashan manatay ho !

Ab kis ka jashan manatay ho !

Ab kis ka jashan manatay ho 

Us dais ka jo taqseem hua 

Ab kis ka geet sunatay ho 

Us tann mann ka jo do neem hua 

Us khawab ka jo reza reza 

In aankhon ki taqdeer hua 

US naam ka jo tukray tukray 

Galiyon main be'touqeer hua 

Us parcham ka jis ki hurmat 

Bazaron main neelaam hui 

Us matti ka jis ki hurmat 

Mansoob adu  kay naam hui 

Us jang ka jo tum haar chukay 

Us rasam ka jo jaari bhi nahin 

Us zakham ka jo seenay pe na tha 

Us jaan ka jo wari bhi nahin 

Us khoon ka jo bad'qismat tha 

Rahon main bahaya tann main raha 

US phool ka jo be'qeemat tha 

Aangan main khilaya ban main raha 

Us mashriq ka jsi ka tum ne 

Nezay ki anni marham samjha 

Us maghrib ka jis ko tum ne 

Jitna bhi loota kam samjha 

Un masoomon ka jin kay lahu 

Se tum ne farozan raatein kein 

Ya un mazlumon ka jin se

Khanjar ki zuban main batein kein 

Us mariyam ka jsi ki iffat 

Lut'ti hai bharray bazaron main 

Us Esa ka jo qatil hai 

Aur shamil hai gham khawaron main 

Un noha garon ka jinhon ne hamein 

Khud qatil kiya khud rotay hain 

Aisay bhi kahin dam'saaz huye 

Aisay jalaad bhi hotay hain 

Un bhookay nangay dhanchon ka 

Jo raqs sar-e-bazar karein 

Ya un zalim qaza'qon ka 

Jo bhais badal kar waar karein 

Ya un jhootay iqra'ron ka 

Jo aaj talak eefa na huye 

Ya un be'bas la'charon ka 

Jo aur bhi dukh ka nishana huye 

Us shahi ka jo dast-ba-dast

ayi hai tumharay hissay main 

Kiyon nang-e-watan ki baat karo

Kya rakha hai is qissay main 

Aankhon main chupaye ashkon ko 

Honton pe wafa kay bol liye 

Us jashan main , main bhi shamil hoon 

Nohon se bharra kash'kol liye     

Sab log liye sang-e-malamat nikal aaye

Sab log liye sang-e-malamat nikal aaye 

Kis shaher main hum ehal-e-mohabbat nikal aaye 

Ab dil ki tamana hai to aye kaash yahi ho 

Aansu ki jaga aankh se hasrat nikal aaye

Her ghar ka diya gul na karo tum keh na'janay 

Kis baam se khurasheed-e-qayamat nikal aaye 

Jo dar pe pindaar hain un qatal gahon se

Jaan de kay bhi samjho keh salamat nikal aaye 

Ae hum'nafso kuch to kaho ehad-e-sitam ki 

Ik harf se mumkin hai hikayat nikal aaye 

Yaro mujhay masloob karo tum keh meray baad 

Shayed keh tumhara qad-o-qaamat nikal aaye 

Suna to hai keh nigar-e-bahar raah main hai

Suna to hai keh nigar-e-bahar raah main hai 

Safar ba'khair keh dushman hazar raah main hai 

Guzar bhi jaa gham-e-jaan-o-gham-e-jahan se keh yeh 

Woh manzil'ain keh jin ka shumaar raah main hai 

Tameez-e-rehbar-o-rah'zan abhi nahin mumkin 

Zara thehar keh bala ka ghubaar raah main hai 

Garoh-e-kaj'kalan ko koi khabar to karay 

Abhi hajoom sar-e-raah'guzaar raah main hai 

Na janay kab ka ponchbhi chuka sar-e-manzil 

Woh shakhs jis ka hamein intizaar raah main hai 

Faraz agarcha karri hai zameen aatish ki 

" Hazaar haa shajar-e-saya'daar raah main hai "

Mat socho

Mat socho !

Aur us ne 

Meray saghar main 

May surkh undaily _____to kaha 

Mat socho !

Tum yahan aaye ho 

Is mulk kay is shaher kay 

Is hujla-e-taskeen main jahan 

Sab kay sab raqs-e-kinaan 

Naghma-e-bulb

Mast ada mat socho 

Jaagti raat 

Kay chehray pe hai khushbu ki rida 

Mat socho

Tum bhi kya log ho 

Pardais bhi aatay ho 

To le aatay hain 

Beemaar shab-o-roz-o-dil afgaar 

Azizaan-e-watan ki yaadein 

Apni zoleeda-o-boseeda qameezon ki tarah 

Jin kay dhabon ko to khud'kaar machin'ein bhi nahin dho sakti 

Yeh jo zangaar hain ghurbat kay 

Khud azaarjo tareekiyan zehno ki hain 

Ala'ishein jismon ki hain 

Is tarah sambhalay huye phirtay ho 

Keh jaisay yeh tumharay dil-o-jaan hon 

Is gharri tum ho jahan 

Mumlikat-e-khawab nahin 

Yahan kisi soch ka gardaab nahin 

Zindagi may ki tarah 

Shokh hai taraar nahin

Zehar ab nahin 

Apnay kash'kol ko dehleez pe rakh ayo 

Keh dar'youza gari 

Is jaga shamil-e-Aadaab nahin 

Mat socho ! 

Jo bhi daroon-e-dil hai woh baahir na aaye ga

Jo bhi daroon-e-dil hai woh baahir na aaye ga 

Ab aagahi ka zehar zuban par na aaye ga 

Ab kay bichar kay us ki nadamat thi is qadar 

Jee chahata bhi ho to palat kar na aaye ga 

Youn phir raha hai kaanch ka paikar liye huye 

Ghafil ko yeh guman hai keh pathar na aye ga 

Phir bo raha hoon aaj un hi sahilon pe phool 

Phir jaisay moj main yeh samnadar na aaye ga 

Main jaan bulb hoon tark-e-taluq kay zehar se 

Woh mut'ma'ein  kh harf to us par na aaye ga 

Jo ranjishein thein jo dil main ghubaar tha na gaya

Jo ranjishein thein jo dil main ghubaar tha na gaya 

Keh ab ki baar galay mil kay bhi gila na gaya 

Ab us kay wada-e-farda ko bhi tarastay hain 

Kal us ki baat pe kiyon Aaitabar aa na gaya 

Ab us kay hijar main ro'ein na wasal main khush hon 

Woh dost ho bhi to samjho keh dostana gaya 

Nigah-e-yaar ka kya hai hui hui na hui 

Yeh dil ka dard hai payaray gaya gaya na gaya 

Sabhi ko jaan thi payari sabhi thay lab basta 

Bas ik faraz tha zaalim se chup raha na gaya 

Youn to pehlay bhi huye us se kai baar juda

Youn to pehlay bhi huye us se kai baar juda 

Lakin ab kay nazar aatay hain kuch Aasaar juda 

Gar gham-e-sood-e-ziyan hai to tehar ja aye jaan 

Keh usi morr pe yaron se huye yaar juda 

Do gharri us se raho door to youn lagta hai 

Jis tarah saya-e-dewaar se dewaar juda 

Yeh judai ki gharri hai keh jharri sawan ki 

" main juda gar yeh kinaan , abar juda , yaar juda "

Kaj'kalahon se kahay kon keh aye be'khabro 

Toq-e-gardan se nahin , tur'rah-e-dastaar juda 

Is qadar roop hain yaaron kay , keh khouf aata hai 

Sar-e-meh'khana juda aur sar-e-darbaar juda 

Ku-e-jaana main bhi khaasa tha Tar'madaar Faraz 

Lakin us shakhs ki saj dhaj thi sar-e-daar juda 

Khawab martay nahin

Khawab martay nahin 

Khawab martay nahin 

Khawab dil hain , na aankhein , na sa'atein keh jo 

Reza reza huye to bikhar jayein gay 

Jisam ki mout se yeh bhi mar jayein gay 

Khawab martay nahin 

Khawab to roshni hain , nawa hain , hawa hain 

Jo kaalay paharon se ruktay nahin 

Zulam kay dozakhon se bhi pukhtay nahin 

Roshni aur nawa aur hawa kay alm 

Maqtalon main ponch kar bhi jhuktay nahin 

Khawab to harf hain 

Khawab to noor hain 

Khawab suqraat hain 

Khawab mansoor hain 

Ab kay rutt badli to khushbu ka safar daikhay ga kon

Ab kay rutt badli to khushbu ka safar daikhay ga kon 

Zakham phoolon ki tarah mehkein gay par daikhay ga kon 

Daikhna sab raqs-e-bismal main magan ho jayein gay 

Jis taraf se teer aaye ga udhar daikhay ga kon 

Zakham jitnay bhi thay sab mansoob qaatil se huye 

Teray haathon kay nishan ae chara gar daikhay ga kon 

Woh hawas ho ya wafa ho baat mehroomi ki hai 

Log to phal phool daikhein gay shajar daikhay ga kon

Meri awazon kay saaye meray baam-o-dar pe hain 

Meray lafzon main utar kar mera ghar daikhay ga kon 

Hum chragh-e-shab hi jab thehray to phir kya sochna 

Raat thi kis ka muqadar aur sehar daikhay ga kon 

Aa faseel-e-shaher se daikhein ghaneem-e-shaher ko 

Shaher jalta ho to tujh ko baam par daikhay ga kon 

Her koi apni hawa main mast phirta hai Faraz 

Shaher-e-na'pursan main teri chasham-e-tar daikhay ga kon 

Ae Khuda jo bhi mujhay pand-e-shakeebai de

Ae Khuda jo bhi mujhay pand-e-shakeebai de 

Us ki aankhon ko meray zakham ki gehraai de 

Teray logon se gila hai meray aaino ko 

In ko pathar nahin deta to beenai de 

Jis kay eema pe kiya tark-e-taluq sab se

Ab wohi shakhs mujhay tahna-e-tanhai de 

Yeh dehan zakham ki surat hai meray chehray par 

Ya meray zakham ko bhar , ya mujhay go'yaai de 

Itna be'sarfa na jaye meray ghar ka jalna 

Chasham-e-giriyan na sahi chasham-e-tamashai de

Jin ko pay'rahan-e-toqeer-o-sharf bakhsha hai 

Woh bar'hana hain unhein khil'at-e-ruswai de 

Kya khabar tujh ko keh kis wazah ka bismal hai Faraz

Woh to qaatil ko bhi ilzaam-e-maseehai  de 

Ab kay tajdeed-e-wafa ka nahin imkaan jaana

Ab kay tajdeed-e-wafa ka nahin imkaan jaana

Yaad tujh ko kiya dilayein tera paymaan jaana

yun he mosam ke ada dekh kar yaad aya hai

kis qadar jald badal jatay hain insaan jaana

Zindage teri ata the so terey naam ki

Hum ne jaisay bhe basar ki tera ehsaan jaana

Dil yeh kehta hai shyed ho afsurda tu bhi

Dil ki kiya baat karain dil to hai nadan jaana

.......Kaaf......

Awal awal ki mohabbat kay nashay yaad to kar 

Bay'pee'ay bhi tera chehra tha gulistan jaana

Aakhir aakhir to yeh aalam hai keh ab hosh nahin 

Rag-e-meena sulag uthi thi keh rag-e-jaan jaana

Mud'daton se yahi aalam na tawaqo na umeed 

Dil pukaray hi chala jata hai jaana jaana

Hum bhi kya sada thay hum ne bhi samjh rakha tha 

Gham-e-doran se juda hai gham-e-jaana jaana

Ab kay kuch aisi saji mehfil-e-yaaran jaana

Sar-ba'zano hai koi sar-ba'giribaan jaana

Her koi apni hi awaaz se kaamp uth'ta hai 

Her koi apnay hi saa'iye se ha'rasan jaana

Jis ko daikho wohi zanjeer bap'pa lagta hai 

Shaher ka shaher hua daakhil-e-zindaan jaana

Ab tera zikar bhi shayed hi ghazal main aaye 

Aur se aur huye dard kay unwaan jaana 

Hum keh roothi hui rutt ko bhi manaa letay thay 

Hum ne daikha hi na tha mousam-e-hijraan jaana 

Hosh aaya to sabhi khawab thay reza reza

Jaisay urrtay huye auraaq-e-parishan jaana

Yeh meri ghazlein , yeh meri nazamein tamam teri hikayatein hain

Yeh meri ghazlein , yeh meri nazamein 

Yeh meri ghazlein , yeh meri nazamein 

Tamam teri hikayatein hain 

Yeh tazkaray teray lutf kay hain 

Yeh shair teri shikayatein hain 

Main sab teri nazar kar raha hoon 

Yeh un zamano ki sa'atein hain 

Jo zindagi kay naye safar main 

Tujhay kisi waqat yaad ayein 

To aik ik harf jee uthay ga 

Pehan kay infaas ki qabaein 

Udaas tanhaiyon kay lamhon 

Main naach uthain gi yeh apsara'ein 

Mujhay teray dard kay ilawa bhi 

Aur dukh thay yeh maanta hoon 

Hazar gham thay jo zindagi ki 

Talash main thay yeh jaanta hoon 

Mujhay khabar thi keh teray aanchal main 

Dard ki rait chhaanta hoon 

Magar her ik baar tujh ko chu kar 

Yeh rait rang-e-hina bani hai 

Yeh zakham gulzaar ban gaye hain 

Yeh aah-e-sozan ghat'ta bani hai 

Yeh dard moj-e-saba hua hai 

Yeh aag dil ki sada bani hai 

Aur ab yeh sari mata-e-hasti 

Yeh phool yeh zakham sab teray hain 

Yeh dukh kay nohay yeh sukh kay naghmay 

Jo kal meray thay woh ab teray hain 

Jo teri qurbar teri judai 

Main kat gaye roz-o-shab teray hain 

Woh tera shair tera mughni 

Woh jis ki baatein ajeeb si thein 

Woh jis kay andaaz khusar'wana thay 

Aur ada'ein ghreeb si thein 

Woh jis ki jeenay ki khawaishein bhi 

Khud us kay apnay naseeb si thein 

Na pooch us ka keh woh dewana 

Bhout dino ka ujjar chuka hai

Woh koh'kan to nahin tha lakin 

Karri chitano se larr chuka hai 

Woh thak chuka tha aur us ka taisha 

Usi kay seenay main garr chuka hai 

Chalo aik baar phir se ajnabi ban jayein hum dono

Khoobsurat morr

Chalo aik baar phir se ajnabi ban jayein hum dono 

Na main tum se koi umeed rakhon dil'nawazi ki 

Na tum meri taraf daikho ghalt andaaz nazron se

Na meray dil ki dharkan larr'kharaye teri baton se

Na zahir ho tumhari kash'ma'kash ka raaz nazron se

Tumhein bhi koi uljhan rokti hai paish qadmi se 

Mujhay bhi log kehtay hain keh yeh jalway par'raiye hain 

Meray hum'raah bhi ruswaiyan hain meray mazi ki 

Tumharay saath bhi guzri hui  raaton kay saye hain 

Ta'aruf rog ho jaye to is ka bhoolna behtar 

Taluq bojh ban jaye to is ka torna acha 

Woh afsana jissay anjaam tak laana na ho mumkin 

Ussay aik khoobsurat morr de kar chorna acha 

Chalo aik baar phir se ajnabi ban jayein hum dono 

Fiza'ein soch rahi hain keh ibn-e-adam ne

Fiza'ein soch rahi hain keh ibn-e-adam ne 

Khird ganwa kay junoon aazma kay kya paya 

Wohi shakist-e-tamana wohi gham-e-ayaam 

Nigaar-e-zeest ne sab kuch luta kay kya paya 

Faraib-e-jannat farda kay jaal toot gaye

Faraib-e-jannat farda kay jaal toot gaye 

Hayat apni umeedon pe sharam'saar si hai 

Chaman main jashan-e-darood-e-bahar ho bhi chuka 

Magar nigah-e-gul-o-lala so'gawar si hai 

Fiza main garam bagulon ka raqs jaari hai

Fiza main garam bagulon ka raqs jaari hai 

Ufaq pe khoon ki meena chalak rahi hai abhi 

Kahan ka mehar munawar , kahan ki tanveer'ein 

Keh baam-o-dar pe siyahi jhalak rahi hai abhi 

Umar bhar reengtay rehnay se kahin behtar hai

Umar bhar reengtay rehnay se kahin behtar hai 

Aik lamha jo teri rooh main wusat bhar de 

Aik lamha jo teray geet ko shokhi de day 

Aik lamha jo teri lay main mussarat bhar de 

Zakham khurda hain takhyul ki uranein teri

Zakham khurda hain takhyul ki uranein teri 

Teray geeton main teri rooh kay gahm paltay hain 

Sar'mageen aankhon main youn hasratein lo deti hain 

Jaisay veeran mizaron pe diye jaltay hain 

Teray nazuk se paron par yeh zar-o-seem ka bojh

Teray nazuk se paron par yeh zar-o-seem ka bojh 

Teri parwaz ko azaad na honay de ga 

Tu ne rahat ki tamana main jo gham pala hai 

Woh teri rooh ko abaad na honay de ga 

Ae tarb zaar-e-jawani ki parishan titli

Ae tarb zaar-e-jawani ki parishan titli 

Tu bhi ik bu-e-giraftaar hai maloom na tha 

Teray jalwon main baharein nazar ati thein mujhay 

Tu sitam khurda-e-adbaar hai maloom na tha 

Main ne jis waqat tujhay pehlay pehal daikha tha

Main ne jis waqat tujhay pehlay pehal daikha tha 

Tu jawani ka koi khawab nazar aayi thi 

Husan ka naghma-e-javed hui thi maloom 

Ishq ka jazba-e-be'taab nazar aayi thi 

Meri dar'manda jawani ki tamana'on kay

Meri dar'manda jawani ki tamana'on kay 

Muz'mahil khawab ki tabeer bata de mujh ko 

Teray daman main gulistan bhi hain veeranay bhi 

Mera hasil , meri taqdeer bata de mujh ko 

Kon janay meray amroz ka farda kya hai

Kon janay meray amroz ka farda kya hai 

Qurbatein barh kay pash-e-maan bhi hi jati hain 

Dil kay daman se lipat'ti hui rangeen nazrein 

Daikhtay daikhtay anjaan bhi ho jati hain 

Tera andaz-e-karam aik haqeeqat hai magar

Tera andaz-e-karam aik haqeeqat hai magar 

Yeh haqeeqat bhi haqeeqat ka fasana hi na ho 

Teri manoos nigahon ka yeh motaat payam 

Dil kay khoon karnay ka aik aur bahana hi na ho 

Teray hathon ki hararat teray sanson ki mehak

Teray hathon ki hararat teray sanson ki mehak 

Tairati rehti hai ehsaas ki pinhaai main 

Dhoondti rehti hain takhiyul ki baanhein tujh ko 

Sard raton ki sulagti hui tanhai main 

Tu kisi aur kay daman ki kali hai lakin

Tu kisi aur kay daman ki kali hai lakin 

Meri raatein teri khushbu se basi rehti hain 

Tu kahin bhi ho teray phool se aariz ki qasam 

Teri palkein , mei aankhon main jhuki rehti hain 

Pyar par bas to nahin hai mera lakin phir bhi

Pyar par bas to nahin hai mera lakin phir bhi 

Tu bata de keh tujhay pyar karon ya na karon 

Tu ne khud apnay tabasam se jagaya hai jinhein 

In tamana'on ka izhaar karon ya na karon 

Meri ujri hui neendon kay shabistano main

Meri ujri hui neendon kay shabistano main 

Tu kisi khawab kay paikar ki tarah aayi hai 

Kabhi apni si , kabhi ghair nazar aayi hai 

Kabhi ikhlaas ki moorat kabhi harjaai hai 

Meray khawabon kay jharokon ko sajanay wali

Meray khawabon kay jharokon ko sajanay wali 

Teray khwabon main kahin mera guzar hai keh nahin 

Pooch kar apni nigahon se bata de mujh ko 

Meri raton kay muqaddar main sehar hai keh nahin 

Chaar din ki yeh rafaqat , jo rafaqat bhi nahin 

Umar bhar kay liye Azaar hui jati hai 

Zinfagi youn to hamesha se parishan si thi 

Ab to her saans garaan baar hui jati hai 

Main ne her chand gham-e-ishq ko khona chaha

Main ne her chand gham-e-ishq ko khona chaha 

Gham-e-ulfat gham-e-duniya main samona chaha 

Wohi afsanay meri simat rawan hain ab tak 

Woh sholay meray seenay main nihan hain ab tak 

Wohi be'sood khalish hai meray seenay main hanooz

Wohi be'kaar tamana'ein jawan hain ab tak 

Woh hi gaisu meri raaton pe hain bikhray bikhray 

Wohi aankhein meri janib nigran hain ab tak 

Kasrat-e-gham bhi meray gahm ka madawa na hui 

Meray be'chain khayalon ko sakon mil na saka 

Dil ne duniya kay her aik dard ko apna to liya 

Muz'mahil rooh ko andaz-e-junoon mil na saka 

Meri takhiyul ka sheeraza barham hai wohi 

Meray bujhtay huye ehsaas ka aalam hai wohi 

Wohi be'jaan iraday wohi be'rang sawal 

Wohi be'rooh kasha'kash wohi be'chain khayal 

Aah isi kash mukash subha-o-masa ka anjaam 

Main bhi na'kaam meri saa'ei amal bhi na'kaam 

Taaj teray liye aik mazhar ulfat hi sahi

Taaj teray liye aik mazhar ulfat hi sahi 

Tujh ko is wadi-e-rangeen se aqeedat hi sahi 

Meray mehboob kahin aur mila kar mujh se 

Bazam-e-shahi main ghareebon ka guzar kya mahni 

Sibat jis raah main hon satoot-e-shahi kay nishan 

Us par ulfat bharri roohon ka safar kya mahni 

Meray mehboob pas-e-parda tasheer-e-wafa 

Tu ne satoot kay nishano ko to daikha hota 

Murda shahon kay muqabar se behalnay walay 

Apnay tareek makano ko to daikha hota 

Un'ginat logon ne duniya main mohabbat ki hai 

Kon kehta hai keh sadaq na thay jazbay un kay 

Lakin un kay liye tasheer ka saman nahin 

Kiyon woh log bhi apni hi tarah muflis thay 

Yeh imaraat-o-maqabar yeh faseelein yeh hisaar

Mutlaq-ul-hukam shehinshah'on ki azmat kay satoon 

Seena dhar kay na'soor hain kehna na'soor

Jazb hai in main teray meray ajdaad ka khoon 

Meri mehboob ! unhein bhi to mohabbat ho gi 

Jin ki sa'naahi ne bakhshi hai ussay shakal-e-jameel 

Un kay payaron kay maqabar rahay be'naam-o-namood

Aaj tak un par jalaai na kisi ne qandeel 

Yeh chaman zaar yeh jamna k akinara , yeh mehal 

Yeh munqish dar-o-dewaar yeh mehraab yeh taaq

Ik shehinshah ne doulat ka sahara lay kar 

Hum ghareebon ki mohabbat ka uraya hai mazaq

Meri mehboob ! kahin aur mila kar mujh se