Kiyon udas hai shajar Ae Adeem Hashmi

Kiyon udas hai shajar Ae Adeem Hashmi

Kon le gaya samar Ae Adeem Hashmi

Ghoomta hai tu kidher Ae Adeem Hashmi

Raah dekhta hai ghar Ae Adeem Hashmi

Taish aur is qadar Ae Adeem Hashmi

Kuch khuda ka khouf kar Ae Adeem Hashmi

Jab woh ja chuka kahin jab woh aaye ga nahin 

Kiyon khula hua hai dar Ae Adeem Hashmi

Rah guzar hi rah guzar reh gayi meray liye 

Manzilein gayein kidher  Ae Adeem Hashmi

Teri sab musaftein kis kay kaam ayein gi 

Kya hua woh humsafar Ae Adeem Hashmi

Jis ko chor hi diya us ka zikar kya adeem 

Aur koi baat kar Ae Adeem Hashmi

Usi aik fard kay wastay meray dil main dard hai kis liye

Usi aik fard kay wastay meray dil main dard hai kis liye 

Meri zindagi ka mutalba wohi aik shakhs hai kis liye 

To jo shaher main hi muqeem hai to musafrat ki fiza hai kiyon 

Tera karwan jo nahin gaya to hawa main gard hai kis liye 

Na jamal-o-husan ki bazam hai na junon-o-ishq ka azam hai 

Sar dasht-e-raqs main her gharri koi gard-baad hai kis liye 

Teray husan se yeh pata chala tujhay dekh kar yeh khabar hui 

Jahan raasta hi nahin koi wahan reh'noord hai kis liye 

Jo likha hai meray naseeb main kahin tu ne parh to nahin liya 

Tera haath sard hai kis liye tera rang zard hai kis liye 

Woh jo tark-e-rabt ka ehad tha kahin tootnay to nahin laga 

Teray dil kay dard ko dekh kar meray dil main dard hai kis liye 

Koi wasta jo nahin raha , teri aankh main yeh nami hai kiyon 

Meray gham ki aag ko dekh kar , teri aah sard hai kis liye 

Tum gaye sari mehfil ujar jaye gi log saray kay saray chalay jayein gay

Tum gaye sari mehfil ujar jaye gi log saray kay saray chalay jayein gay 

Hum mohabbat kay maron ka dar hai agar hum mohabbat kay maray chalay jayein gay 

Pyas dil kay naseebon main hai to rahay pyas ka aur pani ka rishta to hai 

Koi shikwa hai lehron ko hum se agar hum kinaray kinaray chalay jayein 

Qarz tum apni chahat ka do ya na do hum to apni mohabbat kay maqrooz hain 

Tum palat kay pukaro na hum ko magar hum tumhi ko pukaray chalay jayein gay 

Kaisi duniya main aa kay basera kiya , mil kay bhi jis main hona hai sab ko juda 

Teray pyaray bhi saray chalay jayein gay meray pyaray bhi saray chalay jayein gay 

Raat thehro zara raat thehro abhi do gharri aur andhera zara rok lo 

Dhoondna hai muqadar ka tara hamein , din hua to sitaray chalay jayein gay 

Tum na aayo to kya bhool jao to kya , hum ko jitna bhi jeen ahai jeena to hai 

Dosti jo nahin zindagi hi sahi , zindagi hi guzaray chalay jayein gay

Tum bhi apnay saharay chalay jao gay hum bhi apnay saharay chalay jayein gay

Tum bhi apnay saharay chalay jao gay 

Hum bhi apnay saharay chalay jayein gay 

Jo maza raasta mil kay chalnay main hai 

Woh mazay bhi to saray chalay jayein gay 

Mil kay chalnay se manzil na koi milay 

Mil kay chalnay se raasta to kat jaye ga 

Tumhamaray saharay chalay jao gay 

Hum tumharay saharay chalay jayein gay 

Koi jo bhi kahay koi jo bhi karay 

Dil main toofan mohabbat kay ruktay nahin 

Tum bhi hum ko pukaray chalay jao gay 

Hum bhi tum ko pukaray chalay jayein gay 

Aa kay dekho muqabil hamaray zara 

Aisay waisay to hum bhi juwari nahin 

Tum dil-o-jaan jeetay chalay jao gay 

Hum dil-o-jan haaray chalay jayein gay 

Woh haseen hai Adeem us ka mansib hai 

Yeh qatal karta rahay  muskurata rahay 

Tum bhi jaan is pe waray chalay jao gay 

Hum bhi jaan us pe waray chalay jayein gay

Phir jurm-e-mohabbat bhi hai tazeer bhi , main bhi

Phir jurm-e-mohabbat bhi hai tazeer bhi , main bhi 

Be'taab hain phir qaid bhi , zanjeer bhi main bhi 

Tum mujh se milo ya mera likha hua parh lo 

Hum aik tarah hain meri tehreer bhi main bhi 

Manzil thi kisi paon kay neechay kahin matti 

Kehnay ko to hum'rah thay rah'geer bhi main bhi 

Qismat se koi rabt na tha loh-e-jabeen ka 

Do lakhat rahay hain meri taqdeer bhi main bhi 

Woh husan ! keh alfaaz kay bas main hi nahin hai
Hairat main paray hain meri tehreer bhi main bhi

Talib hain teray adal kay , zanjeer bhi main bhi

Talib hain teray adal kay , zanjeer bhi main bhi 

Hazir dil sad chaak bhi hai , teer bhi main bhi 

Phir jurm-e-mohabbat ki sada ki hai sama'at 

Phir ik katehray main hain , zanjeer bhi main bhi 

Qaidi hain na azad na marboot na be'rabt 

Ik umar se mushkil main hain , zanjeer bhi main bhi 

Dono ki kabhi nibh na saki umar bita di 

Roothay hi rahay hain , meri taqdeer bhi main bhi 

Hum saath rahay jurm-e-wafa jab bhi hua hai 

Taqseer bhi , taqdeer bhi , zanjeer bhi , main bhi

Gham hai wahin pe gham ka sahara guzar gaya

Gham hai wahin pe gham ka sahara guzar gaya 

Dariya tehar gaya hai kinara guzar gaya hai 

Bas yeh safar hayat ka , itni si zindagi 

Kiyon itni jaldi raasta sara guzar gaya 

Woh jis ki roshni se chamakna tha bakhat ko 

Kis aasman se woh sitara guzar gaya 

Kya zikar us gharri ka karri thi keh sehal thi 

Jo waqat jis tarah bhi guzra , guzar agya 

Tafheem dosti main bari bhool ho gayi 

Phir door se hi dost hamara guzar gaya 

Kar kay yaqeen phir se , keh main mushkalon main hoon 

Thehra nahin woh shakhs dobara guzar gaya 

Ik waqat khush naseeb sa aaya to tha Adeem 

Madham si ik sada main pukara guzar gaya 

Mujrim hua tha aankh jhapaknay ka main Adeem 

Jo zehan main basa tha nazara guzar gaya

Kis hawalay se mujhay kis ka pata yaad aaya

Kis hawalay se mujhay kis ka pata yaad aaya 

Husan-e-kafar ko jo dekha to Khuda yaad aaya 

Aik toota hua paiman-e-wafa yaad aaya 

Yaad aaya bhi mujhay to aaj kya yaad aaya 

Sham kay haath ne jis waqat laga li mehandi 

Mujhay us waqat tera rang-e-hina yaad aaya 

Kahin aankhon ki nami raaz na afshaa kar de 

Main ne munh phair liya jo zara yaad aaya 

Saray funkaar utha laye thay shah'karon ko 

Aur main tha mujhay andaaz tera yaad aaya 

Kitni duniya thi meray gird tujhay kya maloom 

Bari mushkil se mujhay tera pata yaad aaya 

Teray daman main nami itni ziyada kiyon hai 

Kon sa phool tujhay baad-e-saba yaad aaya 

Jab kisi ko koi umeed wafaon ki na thi 

Mujhay us pal tera paiman-e-wafa yaad aaya 

Qadam uth'tay thay kahan su-e-haram apnay Adeem 

Aaj mushkil nazar aayi to Khuda yaad aaya

Zinda Adeem reh gaye hum thay jo gham ko seh gaye

Zinda Adeem reh gaye hum thay jo gham ko seh gaye 

Warna to sang-e-koh kay pani kay sang beh gaye 

Jo na kisi ne bhi kaha hum ussay woh bhi keh gaye 

Baat koi na thi magar ranj ki ro main beh gaye 

Ehal-e-jamal-o-husan kay pehlay kai hijaab thay 

Ishq-o-junoon kay samnay aur bhi teh-ba-teh gaye 

Husan tha aur ishq tha naam nahin tha khouf ka 

Saray jahan kay samnay sari hi baat keh gaye 

Duniya gharz ki raah se aagay bhout nikal gayi 

Hum keh jo be'gharz banay peechay bhout hi reh gaye 

Chand se is zameen ko kitni hi chandni mili 

Aur zameen kay saye main kitnay hi chand geh gaye

Gham bhi wahin pe reh gaya hum bhi wahin pe reh gaye

Gham bhi wahin pe reh gaya hum bhi wahin pe reh gaye 

Daman-e-chasham se magar aansu tamaam beh gaye 

Us ne bhi kuch nahin kaha Hum ne bhu kuch nahin kaha 

Woh bhi ghamon ko seh gaya hum bhi ghamon ko seh gaye 

Charon taraf jahan main jis pe saza-e-hijar thi 

Woh bhi woh baat keh gaya hum bhi woh baat keh gaye 

Her koi kar kay aankh num mujh ko suna raha hai gham 

Lagta hai sab jahan kay gham meray liye hi reh gaye 

Hum se bata jahan-e-gham kya tujhay aur chahiye 

Sun'nana bhi jo mohaal thay hum to woh gham bhi seh gaye 

Kehnay lagay keh dosti sirf nahin hai zindagi 

Log ajeeb to na thay baat ajeeb keh gaye

Pehlay falak pe noor ka meenar ban gaya

Pehlay falak pe noor ka meenar ban gaya 

Phir is zameen pe saya-e-dewar ban gaya 

Maathay pe dil kay haal ki surkhi likhi gayi 

Insan na main hua koi akhbar ban gaya 

Jis din se main ne nirkh wafa kay barha diye 

Sara hi shaher mera kharidaar ban gaya 

Hona tha yeh mazaq bhi ik din junoon kay saath 

Dil bhi Adeem sahib-e-kirdar ban gaya 

Shayed mujhay hi dekh kay duniya sambhal sakay 

Main is liye adeem gunah'gaar ban gaya 

Ik main , aur us pe woh bhi mera yaar ban gaya

Ik main , aur us pe woh bhi mera yaar ban gaya 

Dewar par bhi saya-e-dewar ban gaya 

Us ne to mujh pe khol diya tha dar-e-wisal 

Apna zameer raah ki dewaar ban gaya 

Sab aik hi nazar se ussay dekhnay lagay 

Lagta hai sab ka aik hi kirdaar ban gaya 

Main ne mujasmay ko teray naqsh kya diye 

Pathar zara si dair main shah'kaar ban gaya 

Aisay Adeem aansu khushi main rawan huye 

Jaisay keh motiyon ka koi haar ban gaya 

Masloob aur saleeb galay mil gaye Adeem

Ik la'zawal wasal sar-e-daar ban gaya 

Bari si umar hui do'dhiya se baal huye

Bari si umar hui do'dhiya se baal huye 

Woh itna pyara hua jitnay maah-o-saal huye 

Kai jawab diye aur kai sawal huye 

Nahin huye woh nahin aashna-e-haal huye

Ussay bhi waqat ki matti ne gard posh kiya 

Libas jis kay zamanay main be'misal huye 

Ik aisay mor pe dono ko jab bicharna tha 

Taluqaat huye to kahan bahaal huye 

Meray naseeb ne gard aashna ussay bhi kiya 

Jo phool us ne diye woh bhi pai'maal huye 

Nahin keh haath kisi ne kabhi nahin thaama 

Par aisay log zamanay main khaal khaal huye 

Koi kamal nahin tha hamari qismat main 

Hum is liye to zamanay main la'zawal huye 

Sukhan wari main naseebon ka haath bhi hai Adeem 

Kiye kamal to seh'wan bhi kuch kamal huye

Aankhon ko teri aankh ka jaadu dikhai de

Aankhon ko teri aankh ka jaadu dikhai de 

Teri tarah hi dasht main aahu dikhai de 

Yeh kya teray wisal ka pehlu dikhai de 

Yeh main dikhai doon keh mujhay tu dikhai de 

Muthi ki kainaat main jugnoo bhi aaftab 

Suraj bhi kainaat main jugnoo dikhai de 

Manzir main , main bhi hoon to mohabbat ki hai kami 

Meri jaga bhi kaash mujhay tu dikhai de 

Main yeh bhi teray husan ka pehlu dikha sakon 

Ae kaash teray wasal ki khushbu dikhai de 

Sab ko pukarta hoon usi naam se Adeem 

Main kya karon keh woh mujhay her su dikhai de 

Woh aik hai to dil ka sambhalna mohaal hai 

Kya ho agar mujhay woh lab-e-ju dikhai de 

Kuch log jin ko fikar-e-ziyan de diya gaya

Kuch log jin ko fikar-e-ziyan de diya gaya 

Kuch woh hain jin ko sara jahan de diya gaya 

Dil ki mohabbaton ka bahao hai jis tarah 

Dariya hai , jis ko aab-e-rawan de diya gaya 

Aankhon ko samnay kay ilaqay diye gaye 

Dil ko chupa hua bhi jahan de diya gaya 

Izhar-e-ishq woh bhi baru-e-sitam'garan 

Koh-e-garan ko sang-e-garan de diya gaya 

Jaisay harray shajar ko laga di gayi ho aag 

Kuch is tarah ka dil ko dhuwan de diya gaya 

Bichray nahin , woh baat bicharnay ki yaad rahay 

Ghao nahin diya hai , nishan de diya gay 

Rehta kissay adeem baharon ka intizaar 

Acha hua keh ehad-e-khizan de diya gaya 

Roz-e-hisab , khouf-e-hisab us ko hai Adeem 

Woh jis ko fikar-e-sood-o-ziyan de diya gaya

Chal diya woh dekh kar pehlu meri taqseer ka

Chal diya woh dekh kar pehlu meri taqseer ka 

Doosra rukh us ne dekha hi nahin tasveer ka 

Baqi saray khat pe dhabbay aansu'on kay reh gaye 

Aik hi jumla parha main ne teri tehreer ka 

Tu ne kaisay lafz honton ki kamaan main kas liye 

Itna gehra ghao to hota nahin hai teer ka 

Azar baqi chaal main hai qaid ko baqi nahin 

Paon aadi ho gaya hai is qadar zanjeer ka 

Aa gayi kashti bhatak kar aab se su-e-sarab 

Bhar gaya reg rawan se jaal mahi geer ka 

Baat choti to nahin tujh se bicharnay ki hai baat 

Faisala tasleem kar loon kis tarah taqdeer ka 

Yaar logon ne ussay kutba bana dala Adeem 

Aakhri pathar bacha jo umar ki tameer ka 

Doston se bhi taluq ban gaya hai woh Adeem 

Jo taluq hai kisi shamsheer se shamsheer ka 

Zehar ki aankhon main roshan suratein do hain Adeem 

Shakal ik suqraat ki aur aik chehra heer ka

Jab ussay chaha to chaha her tarah kay haal main

Jab ussay chaha to chaha her tarah kay haal main 

Her tarah ka husan dekha us kay khad-o-khaal main 

Chal rahi hai yeh zameen zindan ki chaki ki tarah 

Pis rahay hain log kya kya us kay maah-o-saal main 

Misal-e-maahi waqat kay haathon se phisli to bhout 

Phans gayi aa kar jawani jhuriyon kay jaal main 

Intihaon par rahay hum darmiyan thehray nahin 

Aasman ki ooj par ya gir gaye pa'taal main 

Yeh bhi kya insaaf hai Ae munsaf-e-wasal-o-firaq 

Us ki aadhi bhi jhalak dekhi na pooray saal main 

Ibtida se hashar tak sab teen pinjron main hain qaid 

Koi mazi , koi mustaqbil main , koi haal main 

365 dareechay waqf suraj kay liye 

Chand ki khatar bani bara dari her saal main 

Main ne socha tha kisi ko main bhi dhoka doon Adeem 

Shakal apni hi nazar aayi sabhi ashkaal main

Apnay hi dost-o-pa meray apnay raqeeb ho gaye

Apnay hi dost-o-pa meray apnay raqeeb ho gaye 

Teray baghair phail kar bazu saleeb ho gaye 

Koi hansa to ro paray roya to muskura diye 

Ab kay teri judai main hum to ajeeb ho gaye 

Aaj bhi dekh dekh kar waday ka din guzar gaya 

Aaj bhi phail phail kar saye moheeb ho gaye 

Loh-e-jabeen pe is tarah likhi gayein musaftein 

Itna chalay keh raastay apna naseeb ho gaye 

Shiddat-e-gham ko dekh kar gham ko bhi reham aa gaya 

Woh jo kabhi raqeeb thay woh bhi habib ho gaye 

Hum se Adeem faisalay kitnay ajeeb ho gaye 

Rakhna tha jin se faasla un kay qareeb ho gaye 

Us ki rafaqaton se hum kitnay ameer thay Adeem 

Woh jo bichar gaya to hum kitnay ghareeb ho gaye

Woh jis ne kuch kaha hi nahin tha jawab main

Woh jis ne kuch kaha hi nahin tha jawab main 

Chehra wohi dikhai diya hai gulaab main 

Dekha hai jitni baar bhi is ko hijaab main 

Aisay laga keh phool khila hai niqaab main 

Shamil kabhi hui thi judai nisab main 

Sehmay huye hain lafz abhi tak kitab main 

Ik baar us ko ro kay bhout yaad kar liya 

Phir is kay baad woh kabhi aaya na khawab main 

Tu yeh to dekh main ne tujhay muntakhib kiya 

Kitna jafa pasand hoon main intikhab main 

Su-e-falak uthai nazar us ne kya Adeem 

Apna hi aks dekh liya mahtaab main

Zindagi sirf isi dhun main guzaray jayein

Zindagi sirf isi dhun main guzaray jayein 

Bas tera naam , tera naam pukaray jayein 

Jab yeh teh hai keh yahan koi nahin aaye ga 

Kis ki khatar dar-e-dewar sanwaray jayein 

Aik tujh tak na ponch paye meray dard ki aanch 

Aasman tak to meray gham kay shararay jayein 

Jab mulaqaat na thi tab to koi baat na thi 

Ab yeh tanhai kay din kaisay guzaray jayein 

Yahan gham'khawar nahin hai wahan azaar nahin 

Kis jahan main yeh teray dard kay maaray jayein 

Main andheron main nahin main to wahan jaon ga 

Woh jahan saath meray chand sitaray jayein 

Jeet kar to kahin lay jaye musalsal hum ko 

Aur hum roz teri chah main haaray jayein 

Marg-e-jaan gar na sahi marg-e-mohabbat hi sahi 

Zindagi kuch to tera qarz utaaray jayein 

Faaslon se na hua josh-e-mohabbat ka ilaaj 

Yeh to kuch aur bhi jazbon ko ubharay jayein 

Bazam-e-ehbaab to tasveer ka aik rukh hai Adeem 

Is main dushman bhi to do chaar hamaray jayein 

Wasal kay baad mohabbat ki saza theek Adeem 

Maaray jayein bhi to kiyon muft main maaray jayein

Kaisi bhala yeh barhami kaisa yeh page-o-taab hai

Kaisi bhala yeh barhami kaisa yeh page-o-taab hai

Jaisa tera sawal hai waisa mera jawab hai

Tu hai falak to main zameen yeh to nahin keh main nahin

Zarha-e-khaak main bhi hoon tu agar aaftab hai

Ghar se chali hai khubaru aik hajoom chaar su

Rang hai ya saza koi husan hai ya azaab hai

Miltay rahein to zindagi ginti ki chaar saa'atein

Bichrein to aik aik pal muddat-e-be'hisab hai

Umar-e-daraaz hijar se wasal ka aik pal bhout

Itni gharri to mil mujhay jitni gharri habaab hai

Phool wohi chaman wohi , sara hi baank'pan wohi

Aik hi shaakh par koi kaanta , koi gulaab hai

Aik sa hai muqabla dono main koi kam nahin

Jaisi haseen aankh hai waisa haseen khawab hai

Duniya main kon kon hai yeh to zara bataiye

Saray jahan kay lab pe hai duniya bari kharab hai

Shaakh-e-gulaab par Adeem lagtay hain dil khilay huye

Sehan-e-badan main dil Adeem lagta hai ik gulaab hai

Ashkon ki ik taraf Adeem doobi hui hai chashm-e-tar

Ashkon ki doosri taraf her koi zer-e-aab hai

Baarish hai aansu'on ki zameen pe jharri hui

Baarish hai aansu'on ki zameen pe jharri hui 

Phir bhi hai dil main dard ki nadi charhi  hui 

Baqi tamam umar bicharnay ki baat thi 

Milnay ki guftagoo to gharri do gharri hui 

Yeh raah to chuni thi judai kay wastay 

Yeh aarzu'-e-wasal kahan aa kharri hui 

Yeh raah ki nahin , yeh muqaddar ki baat hai 

Manzil chunni hai jo wohi manzil karri hui 

Sun to sahi hawa-e-khizan dekh to sahi 

Kya keh rahi hai phool ki pati jharri hui 

So saal bhi to lamha ba'lamha baray huye 

Yeh umar is tarah bhi gharri ki gharri hui 

Ik pal main jo hai doosray pal main nahin hai woh 

Her ik gharri main umar zara si barri hui 

Taray falak pe aankh main aansu wisal kay 

Yeh raat motiyon se hai sari jarri hui  

Is kay liye to raah-e-wafa chahiye Adeem 
Her raah main nahin hai mohabbat parri hui 

Kis ki majaal arz-o-sama ko hila sakay 
Jo cheez jis jaga thi wahin hai parri hui 

Zouq-e-sukhan yeh naaz youn hi to nahin Adeem 
Hum ne bhi Meer zaa ki ghazal hai parhi hui 

Nazrein parein zara si teri kainaat par 
Dekhi , bina baghair imaarat kharri hui 

Adam hai aik no-e-bashar mukhtalif Adeem 
Sachi hai baat phir bhi lagi hai gharri hui

Agar main toot kar zarhon main bikhar jaon

Agar main toot kar zarhon main bikhar jaon 

Phir bhi mera dard kabhi nu'mayan nahin ho sakta

Hadood-e-aqal hai ibtada-e-junoon

Hadood-e-aqal hai ibtada-e-junoon 

Koi dewana hi janay ishq-e-fanoon

Raat youn dil main teri khoi hui yaad aayi

Raat youn dil main teri khoi hui yaad aayi 

Jaisay veeranay main chupkay se bahar aaye 

Jaisay sehraon main holay se chalay baad-e-naseem 

Jaisay beemar ko be'wajah qaraar aa jaye

Zaroori nahin alfaaz hi mafhoom hon

Zaroori nahin alfaaz hi mafhoom hon 

Dard bhi ik apni zuban rakhtay hain

Aqal ne kiya gum'rah mujhay

Aqal ne kiya gum'rah mujhay 

Nadan thay to achay thay

Kitna shor hai meray andar dil kay toot janay ka

Kitna shor hai meray andar dil kay toot janay ka 

Ehsaas tak na hua mujhay Rab kay rooth janay ka

Ta'ajub hai mujhay waqat ki raftaar pe

Ta'ajub hai mujhay waqat ki raftaar pe 

Yahan ik pal nahin kat'ta aur umar beet gayi

Yeh mohabbat tujhay wali kar day

Yeh mohabbat tujhay wali kar day 

Tu agar seekh lay wafa karna

Dard bhi khud hoon aur dawa bhi khud hoon

Dard bhi khud hoon aur dawa bhi khud hoon 

Apnay her sawal ka main jawab bhi khud hoon

Faqar main fikar hi kya kuch kho janay ki

Faqar main fikar hi kya kuch kho janay ki 

Yahi to ik raah hai Ya'Rab tujhay panay ki

Eham yeh nahin keh main kya hoon

Eham yeh nahin keh main kya hoon 

Eham yeh hai keh main kon hoon

Manzalon ka pata lagana kiyon

Manzalon ka pata lagana kiyon 

Hai musafir to phir thikana kiyon 

Raastay main agar bicharna hai 

Phir qadam se qadam milana kiyon 

Jissay ehsaas hi nahin koi 

Haal dil ka ussay sunana kiyon 

Kiyon kisi ne kisi ko chor diya 

Phir wohi waqiya purana kiyon 

Ajnabiyat main yeh tarap to na thi 

Sochta hoon keh us ko jaana kiyon 

Ab to us ka koi ilaaj nahin 

Tu ne dil ka kaha maana hi kiyon 

Qurbatein kiyon na thein muqaddar main 

Lay gaya dour Aab-o-dana kiyon 

Khat chuppay ga kis tarah se mehram-e-dil'geer ka

Khat chuppay ga kis tarah se mehram-e-dil'geer ka 

Lafz her ik bolta hai pyar ki tehreer ka 

Hai yahi jannat mujhay hissa meri jageer ka 

Shakh aik ziytoon ki aur ik shajar injeer ka 

Teray chehray ka ta'sur , teri aankhon ka khumaar 

Husan aisa to nahin hai wadi-e-kashmir ka 

Motiyon jaisay hain aansu phool jaisi hai hansi 

Kon sa rukh samnay rakhon teri tasveer ka 

Woh jahan kuch bhi nahin hai us ki yadon kay siwa 

Hai wohi to qeemti hissa meri jageer ka 

Jab mohabbat ka mehal apna aasra hai Adeem 

Kya koi armaan rahay dil main kisi tameer ka 

Jo naseebon main nahin main woh zara le loon Adeem 

Woh to mil hi jaye ga hissa hai jo taqdeer ka 

Aankhon main aansu'on ko ubharnay nahin diya

Aankhon main aansu'on ko ubharnay nahin diya 

Matti main motiyon ko bikharnay nahin diya 

Jis raah par parray thay teray paon kay nishan 

Us raah se kisi ko guzarnay nahin diya 

Chaha to chahaton ki hadon se guzar gaye 

Nasha mohabbaton ka utarnay nahin diya 

Her baar hai naya teray milnay ka zaiqa 

Aisa samar kisi bhi shajar ne nahin diya 

Yeh hijar hai to is ka faqat wasal hai ilaaj 

Hum ne yeh zakham waqat ko bharnay nahin diya 

Itnay barray jahan main jaye ga tu kahan 

Is ik khayal ne mujhay marnay nahin diya 

Saahil dikhai de to raha tha bhout qareeb 

Kashti ko raasta hi bhanwar ne nahin diya 

Jitna sakoon mila hai teray saath rah main 

Itna sakoon to mujhay ghar ne nahin diya 

Us ne hansi hansi main mohabbat ki baat ki 

Main ne Adeem us ko mukarnay nahin diya

Niklay gi jab bhi rooh badan ki kaman se

Niklay gi jab bhi rooh badan ki kaman se 

Aaye ga teer door bhout aasman se 

Yeh baar-e-khaak tan se utarnay to do zara 

Hairat main doob jayo gay us ki uraan se

Kitnay gawah qatal-e-wafa kay thay chasham-e-deed 

Ik lafaz bhi na nikla kisi ki zuban se

Yeh faaslay dilon kay samandar ki misal hain 

Us ka makan to door nahin hai makan se

Jo ghao bhar gaya hai ussay dekhtay ho kya 

Takleef ka pata na chalay ga nishan se

Logon kay ashk ponjh kar aisay laga Adeem 

Khushiyan khareed li hain ghamon ki dukan se

Ik pal baghair dekhay ussay kya guzar gaya

Ik pal baghair dekhay ussay kya guzar gaya 

Aisay laga keh aik zamana guzar gaya 

Sab kay liye buland rahay haath umar bhar 

Apnay liye duaon ka lamha guzar gaya 

Koi hajoom-e-dehar main karta raha talaash 

Koi raah-e-hayat se tanha guzar gaya 

Milna to khair us ko naseebon ki baat hai 

Dekhay huye bhi us ko zamana guzar gaya 

Dil youn katta hua hai kisi ki judai main 

Jaisay kisi zameen se dariya guzar gaya 

Is baat ka malaal bhout hai mujhay Adeem 

Woh meray samnay se akela guzar gaya 

Hum dekhnay ka dhang samjhtay rahay Adeem 

Itnay main zindagi ka tamasha guzar gaya 

Baqi bas aik Naam-e-Khuda reh gay Adeem 

Sab kuch baha kay waqat ka dariya guzar gaya

Shamil tha yeh sitam bhi kisi kay nisab main

Shamil tha yeh sitam bhi kisi kay nisab main 

Titli mili hanoot purani kitab main 

Dekhon ga kis tarah se kisi ko azab main 

Sab kay gunnah daal de meray hisaab main 

Phir be'wafa ko behr-e-mohabbat samjh liya 

Phir dil k nao doob gayi hai saraab main 

Pehlay gulab us main dikhai diya mujhay 

Ab woh mujhay dikhai diya hai gulab main 

Woh rang-e-Aatishein woh dehakta hua shabaab 

Chehray ne jaisay aag laga di niqaab main 

Baarish ne apna aks kahin dekhna na ho 

Kiyon aainay ubharnay lagay hain habaab main 

Gardish ki teziyon en ussay noor kar diya 

Matti chamak rahi hai yahi aaftab main 

Us sang'dil ko main ne pukara to tha Adeem 

Apni sada hi loat kar aayi jawab main

Faisala us ne sunaya bhi nahin taqseer ka

Faisala us ne sunaya bhi nahin taqseer ka 

Par gaya hai dil pe pehlay hi nishan zanjeer ka 

Koi kehta hai milein gay , koi kehta hai nahin 

Kuch pata chalta nahin hai khawab ki tabeer ka 

Kaghazon main to koi ehsaas ka ansar nahin 

Rang urta jaa raha hai kiyon teri tehreer ka 

Roz kitnay karwan jatay hain su-e-aasman 

Naqsh-e-paa milta nahin lakin kisi raah'geer ak 

Dard likh kar de diye hain us ne saray hi Adeem 

Us ne hissa de diya mujh ko meri jageer ka

Mil rahay hain umar bhar alehida nahin huye

Mil rahay hain umar bhar alehida nahin huye

Ghamon se mar gaye magar alehida nahin huye

Main kya karon kahan hanson kahan par aankh num karon

Kabhi hum is se pesh'tar alehida nahin huye

Hawa chali to youn chali keh aag aur barh gayi

Alaao se magar sharar alehida nahin huye

Woh margh'zaar tha koi keh regzaar tha koi

Bahar se kabhi shajar  alehida nahin huye

Kisi bhi dil se khawaishein nikal do gay kis tarah 

Kisi jaga zameen se ghar alehida nahin huye

Nazar ko jo bhala laga usi pe dil machal gaya 

Kabhi kahin dil-o-nazar alehida nahin huye

Kisi ki aankh num nahin kisi ko koi gham nahin 

Yeh be'hissi hai kiyon agar alehida nahin huye

Zara si aik boond main jahan larz larz gaya 

Adeem ashk-o-chasham-e-tar alehida nahin huye

Firaq-o-hijar se tarap nikal do gay kis tarah 

Adeem behar se bhanwar alehida nahin huye

Adeem gham ajeeb hain azal se hi qareeb hain 

Kabhi kisi maqam par alehida nahin huye

Kis khud gharz jahan main aana para mujhay

Kis khud gharz jahan main aana para mujhay 

Haath apnay haath se churana para mujhay 

Pehlay zameen ka bojh banaya mera wajood 

Phir is zameen ka bojh uthana para mujhay

Teray liye sana-o-ibadat ki khetiyan 

Apnay liye anaaj ugaana para mujhay 

Chahon to Ae Khuda teri aankhein na gin sakon 

Phir bhi uchal kay khud ko dikhana para mujhay 

Saat aasman hain Gosh-e-Khuda ki tarah moheet 

Phir bhi bhout hi shor machana para mujhay

Main itna be'niaz nain hoon teri tarah 

Tang aa kay teray samnay aana para mujhay 

Suraj ponch saka na andheray talak Adeem 

Raat aayi to chragh jalana para mujhay

Yeh to nahin urooj-e-baharan chasheeda hoon

Yeh to nahin urooj-e-baharan chasheeda hoon 

Ae mousam-e-khizan main abhi no'dmeeda hoon 

Hansta hoon is liye  keh tabasum guzeeda hoon 

Duniya samjh rahi hai sitam na'reseeda hoon 

Meri sada jidher hai udher ki hawa nahin 

Awaz hoon zaroor maga na'shaneeda hoon 

Woh samnay hai phir bhi mujhay dekhta nahin 

Main afreeda ho kay bhi na'afreeda hoon 

Ab tak sawal-e-hijar ka soojha nahin jawab 

Ik umar ho gayi hai youn hi sar'khameeda hoon 

Dar hai keh aansu'on main kahin tu doob na jaye 

Tu samnay na aa main abhi aab'deeda hoon 

Ik aaftab-e-hijar falak par hua talooh 

Lagta hai sad'hazar qayamat chasheeda hoon 

Sab aarzi haroof hain tehreer-e-waqat kay 

Mujh main yeh farq hai keh zara khat'kasheeda hoon

Dast-e-talab karon to bhala kis tarah daraaz

Maloom hai mujhay keh main daman da'reeda hoon 

Dhalta nahin nigah se manzar judai ka 

Halan'keh main to sham-o-sehar aab'deeda hoon

Phir wohi dewar woh hi dar lagay

Phir wohi dewar woh hi dar lagay 

Yeh to phir mujh ko usi ka ghar lagay 

Gard suraj kay zameen ghoomi bhout

Us gali main ya meray chakar lagay 

Khawaishon ki jab bhi had bandi karon 

Dairay se her koi baahir lagay 

Ik takhiyul aur phir tera khayal 

Par to pehlay bhi thay ab sheh'par lagay 

Jab kabhi aaya taqabal ka sawal 

Khud se saray hi log behtar lagay 

Jis tarah ka beej waisa hi samar

Phal darakhton ko zameen ko ghar lagay 

Us jaga pe chaaon paati hai wajood

Jis jaga par dhoop ko thokar lagay 

Her dar-o-dewaar ki maangon dua 

Mujh ko to her ghar hi apna ghar lagay 

Bhook dekhon jab kisi ki bhi Adeem 

Dana-e-gandum mujhay kankar lagay

Pehlay is dehleez se to sar lagay

Pehlay is dehleez se to sar lagay 

Phir agar lagti hai to thokar lagay 

Kya mujhay aata hai rasta aik hi 

Yeh to phir mujh ko usi ka ghar lagay 

Yeh kahin rasta isi ka to nahin 

Her qadam pe kiyon mujhay thokar lagay 

Aik pathar yaad hai us ko bhout 

Youn to pagal ko kai pathar lagay 

Phir bichar jaye hamesha kay liye 

Woh galay aik baar to aa kar lagay 

Sab main tha ehsaas lakin itna kam 

Mujh ko saray log hi pathar lagay 

Wasal us ka meri qismat main Adeem 

Dar lagay mujh ko bhout hi dar lagay 

Yeh to seedhi baat hai bikul Adeem 

Husan woh jo aankh ko behtar lagay 

Be'wafa ko galiyan de kar Adeem 

Yeh laga shaitan ko kankar lagay 

Koi itna to saa'rahay aakhir

Koi itna to saa'rahay aakhir 

Us ne waday to nibhaye aakhir 

Phir na milnay ki qasam toot gayi 

Mil gaye phir sar-e-rahay aakhir 

Youn tarapna tha jo machli ki tarah 

Tu ne chora ussay kaahay aakhir 

Kitnay chehray hain haseen duniya main 

Koi kis kis ko sarahay aakhir 

Chahnay ki bhi to had hoti hai 

Dil kahan tak ussay chahay aakhir 

Thak kay beemar bhi dam tor gaya 

Kab talak koi kaa'rahay aakhir